Destacados

Anaír Rodríguez presenta ‘Pioneiras 2’

Na véspera do Día da Muller falamos de ‘Pioneiras 2’ coa súa autora, Anaír Rodríguez.

Proxéctase en Ourense o primeiro capítulo de ‘STRPTS’

Cinema Sticado presenta hoxe no Auditorio Municipal de Ourense o primeiro capítulo de ‘STRPTS’, unha obra de cine en vivo.

Domingo Villar preséntanos o seu novo libro, ‘O último barco’

Neste espazo cultural conversamos con Domingo Villar, que nos presenta o seu novo libro, ‘O último barco’, publicado pola Editorial Galaxia.

Unha viaxe entre Vigo e Moaña a través da desaparición de Mónica Andrade. Trátase da terceira entrega das andanzas do inspector Leo Caldas e do seu escudeiro aragonés Rafael Estévez. Despois de ler ‘Ollos de auga’ e ‘A praia dos afogados’, é o momento de mergullarse neste novo libro.

“Eu teño o costume de ler en voz alta o que vou escribindo e sempre lle lía o meu pai, non en busca dun xuízo, senón en busca dun oído”, recorda o escritor.

Día da Muller dende o Consello da Cultura Galega

Neste Diario cultural imos ata a biblioteca do Consello da Cultura Galega. O vindeiro 8 de marzo, as mulleres volven saír ás rúas para reinvindicar os seus dereitos.

“Esta é unha loita de hai máis de 200 anos que pasa por diferentes etapas, estamos agora no que se chama a ‘cuarta onda’ do feminismo, protagonizada polas mulleres máis novas e que mesmo poñen en cuestión novos aspectos”, explica María Xosé Porteiro, coordinadora da Comisión de Igualdade do Consello da Cultura Galega.

O Consello da Cultura Galega ofrece, a través da súa web, fondos documentais para descubrir a historia do 8 de marzo. Isto lévanos ata as fábricas téxtiles de Nova York a mediados do século XIX, onde as mulleres comezaron unha loita que continúa hoxe.

“En Galicia temos un movemento feminista organizado que ten moita historia, que comezou moi cedo e que reflicte todas as pólas polas que foi avanzando o feminismo, con figuras moi senlleiras como Nanina Santos Castroviejo e María Xosé Queizán”, engade María Xosé Porteiro.

Hoxe tamén comeza o ciclo de cine Olladas de mulleres, organizado polo Consello da Cultura Galega e o CGAI, en que se proxectan obras fílmicas realizadas por mulleres como Todas as mulleres que coñezo, de Xiana do Teixeiro.

Como volven as mulleres pola noite á casa? “Estou chegando á casa”, “imito o andar dun home” ou “quen non fixo como que fala por teléfono?” son algunhas das frases que forman parte da vida cotiá da muller.

Neste espazo cultural tamén falamos con Dolores Vilavedra, secretaria do Consello da Cultura Galega, e con Håkan Casares, coordinador do Observatorio da Cultura Galega.

Porque o feminismo forma parte da cultura galega e do noso pasado, presente e futuro.

A mostra ‘Cosmoloxías’ chega a Fonseca despois de nacer nunha noite no Sáhara

Hoxe escoitamos música cósmica e miramos cara ao universo. A mostra de arte Cosmoloxías, organizada polo Instituto Galego de Física de Altas Enerxías, está exposta no Colexio de Fonseca, en Santiago de Compostela.

“A arte e a ciencia teñen moitas preguntas en común e un grande interese polo misterio”, explica a artista arxentina e responsable da mostra Irene Dubrovsky.

“A experiencia máis forte que tiven co ceo foi nunha viaxe que fixen a Marruecos, onde me internei na paisaxe das dunas do deserto. Aí naceu unha das pezas que presentamos na exposición, que en realidade é a tradución dunha experiencia nocturna na soidade do deserto. Un momento en que estás soa xunto ao ceo”, explica a artista.

Como converter en tanxible algo que é infinito? “Pensando que o ceo é un código, unha linguaxe con xeometría”, conta Irene.

“Arte e ciencia son moito máis parecidos do que se cre. Son dúas actividades de creatividade e busca de verdade”, explica o físico teórico Jose Edelstein, con quen tamén falamos neste espazo cultural para entender a arte dende a perspectiva científica.

Quen foron os premiados dos Mestre Mateo?

A gran triunfadora da noite foi a película A sombra da lei. O filme dirixido por Dani de la Torre e producido por Vaca Films obtivo dez premios, entre eles, mellor película e mellor dirección.

O actor Luís Tosar acadou o galardón por mellor interpretación masculina. Rodrigo Vázquez consegue o Mestre Mateo como mellor comunicador de televisión polo programa Ti verás da Televisión de Galicia.

A actriz Melania Cruz obtén o Mestre Mateo pola súa interpretación feminina de reparto en Trote; Raquel Fidalgo e Noé Montes, por mellor maquillaxe e peiteado en A sombra da lei; e Clara Bilbao, por mellor vestiario en A sombra da lei.

Federico Pérez logra o Mestre Mateo á mellor interpretación masculina de reparto polo seu papel en Trote. E Buscadores de naufraxios, como mellor programa de televisión.

A academia do audiovisual galego premia a actriz Mela Casal co premio Fernando Rei. O seu discurso foi un dos momentos máis emocionantes da gala.

Neste espazo cultural falamos con Emma Lustres, produtora de A sombra da lei; e con Xacio Baño, director de Trote, outra das grandes triunfadoras da noite, con cinco galardóns.

Pin It on Pinterest