Destacados

O Pórtico da Gloria volve abrirse ás visitas

O Pórtico da Gloria volve abrir as súas portas despois dunha década de restauración e estudo. Meses e anos de moito traballo para frear o deterioro do paso do tempo. O resultado é unha xoia que recupera a policromía da obra de Mestre Mateo e, por tanto, o seu valor máis auténtico.

Dende hoxe, os visitantes poden desfrutar de visitas guiadas, máis longas e de pago porque “agora son visitas con valor engadido, cun carácter diferente”, explica Daniel Lorenzo, director da Fundación Catedral.

Neste espazo cultural falamos co experto en proxectos artísticos, Francisco Prado Vilar. “Foi curioso decatarse de que coñeciamos o Pórtico dende lonxe e coas cores apagadas”, explica. Neste proceso de recuperación da obra, os mesmos investigadores aseguran que descubriron moitas cousas que lles sorprenderon, así como máis datos sobre quen era o gran Mestre Mateo.

Luís Vallecido pon música aos contos clásicos

Volven os contos clásicos, pero esta vez con música e baile. Luis Vallecido publica ‘Cantamos’, un libro-disco no que podemos escoitar as historias de sempre dunha forma diferente. Esta obra chega da man dunha nova editorial, Guindastre. Nas ondas da Radia Picariña, a emisora infantil da Radio Galega, xa podemos escoitar estas auténticas obras de arte.

“Teño unha débeda importante co público galego”, conta este músico madrileño, ao que engade: “este disco é unha forma de devolverlle a Galicia todo o agarimo que sempre me deu”. Un libro creado co amor á terra e á cultura galega.

Neste espazo cultural tamén recibimos a visita de Celtia Figueiras, autora dos textos de ‘Cantamos’. A obra inclúe uns elementos moi anovadores: os pictogramas. Así nace un libro inclusivo, que facilita o acceso para os máis pequenos da casa. “Non somos concientes do importante que son os pictogramas para facilitar a lectura das persoas con autismo”, explican os dous artistas.

Pecha o MAC, o Museo de Arte Contemporánea da Coruña

Pecha o MAC, o Museo de Arte Contemporánea da Coruña

A crítica de arte Natalia Poncela presenta “Nem tudo é arte? Mod@s de olhar”

Un ensaio publicado por Através na colección Alicerces que dirixe Teresa Moure

Podcast Diario Cultural 17:30

O Diario Cultural de esta tarde emitiuse dende a Sala Iguana de Vigo, polo 28 aniversario do local e a súa influencia na música viguesa. Os seus propietarios e encargados fixeron un percorrido pola intensa vida da sala, dende a súa fundación no ano 1990.

A Iguana foi punto de encontro para os afeccionados do rock and roll da cidade viguesa e reuniu a algúns dos grupos máis coñecidos do panorama galego. Un dos convidados principais será Billy, encargado da sala durante moitos anos, labor que compaxinou co seu traballo de músico no grupo Killer Barbies.  Para falar da influencia de Iguana na música viguesa interviu no espazo Xosé Otero, presentador do programa ‘A Canteira’ de Radio Ecca. Otero explicou a historia dos grupos que se deron a coñecer na sala viguesa.

Bailamos música tradicional con Serxio Cobos

Bailar é unha forma de transmitir a nosa cultura e coidala para o futuro. Cando queremos conservar as palabras, podemos escribilas. E, para non esquecer as melodías, temos as partituras. Pero, como gardamos os bailes?

A solución son os ‘bailegramas’, que chegan da man do músico Serxio Cobos. “Cando era pequeno decateime da necesidade de escribir o que aprendía no baile”, conta o autor.

Luisa Castro publica o poemario ‘Actores vestidos de calle’

A escritora Luisa Castro presenta o poemario ‘Actores vestidos de calle’, publicado pola Editorial Visor. Esta obra chega nove anos despois do seu último libro, un tempo que aproveitou para “reflexionar e ler porque ás veces, a nivel literario, o tempo e a vida piden parar”

Neste tempo, Luisa Castro desenvolveu o seu traballo como directora do Instituto Cervantes, onde descubriu a importancia do traballo colaborativo. Agora volve cunha poesía renovada, froito do diálogo e de reflexión persoal. “Hai tanto sobre o que escribir. Todas as cousas do día son motivo de escritura”, conta a poeta.

O poemario ‘Actores vestidos de calle” fala da soidade do escritor e do que hai no interior de cada persoa. Como é o tempo de silencio cando un escritor deixa de escribir? Que hai detrás de nós cando nos quitamos a máscara?

DJ Mil animará a noite de fin de ano na Praza de Cervantes de Compostela

“Phonorama” amenizará a noite de fin de ano na Praza de Cervantes en Santiago de Compostela desde a 01:00 da madrugada. Falamos con DJ Mil para que nos conte un pouco máis sobre a actuación e a súa carreira.

Rosalía de Castro, protagonista do premio nacional de ensaio

Hoxe viaxamos no tempo ata o 24 de febreiro de 1837, data na que nace a gran Rosalía de Castro. A obra ‘Rosalía de Castro. Cantos de independencia e liberdade (1837-1863)’ de María Xesús Lama e publicada pola Editorial Galaxia vén de recibir o galardón do Premio Nacional de Ensaio 2018, un recoñecemento outorgado polo Ministerio de Cultura.

“Ter un premio nacional de ensaio é unha gran noticia para a cultura galega”, conta María Xesús Lama neste espazo cultural. Nas páxinas da súa obra, o lector pode descubrir unha imaxe diferente de Rosalía. “Os lectores amósanse abraiados despois de ler a obra”, asegura a autora.

Recordamos a obra poética de Xela Arias

A Editorial Xerais recolle a obra poética de Xela Arias no volume ‘Poesía reunida (1982-2004)’. Neste espazo cultural falamos con María Xesús Nogueira, responsable da recompilación, quen explica que se trata dun “traballo de anos que responde a unha gran demanda do público por acceder a estes textos”.

O volume inclúe as obras da poeta, dende ‘Denuncia do equilibrio’ ata o seu derradeiro libro, ‘Intempériome’. A creación da poeta afástase da tendencia que dominaba no momento. A súa obra estaba en constante revisión e ruptura, o que deixaba latente certa tensión propia dos anos nos que viviu a escritora.

A recompilación tenta manter “a autenticidade de Xela Arias, que represente como escribía ela”, conta a investigadora María Xesús Nogueira. Coa publicación deste libro, a literatura dá un paso máis para evitar o esquecemento de voces que son fundamentais na cultura galega.

Pin It on Pinterest