Destacados

Quen foron os premiados dos Mestre Mateo?

A gran triunfadora da noite foi a película A sombra da lei. O filme dirixido por Dani de la Torre e producido por Vaca Films obtivo dez premios, entre eles, mellor película e mellor dirección.

O actor Luís Tosar acadou o galardón por mellor interpretación masculina. Rodrigo Vázquez consegue o Mestre Mateo como mellor comunicador de televisión polo programa Ti verás da Televisión de Galicia.

A actriz Melania Cruz obtén o Mestre Mateo pola súa interpretación feminina de reparto en Trote; Raquel Fidalgo e Noé Montes, por mellor maquillaxe e peiteado en A sombra da lei; e Clara Bilbao, por mellor vestiario en A sombra da lei.

Federico Pérez logra o Mestre Mateo á mellor interpretación masculina de reparto polo seu papel en Trote. E Buscadores de naufraxios, como mellor programa de televisión.

A academia do audiovisual galego premia a actriz Mela Casal co premio Fernando Rei. O seu discurso foi un dos momentos máis emocionantes da gala.

Neste espazo cultural falamos con Emma Lustres, produtora de A sombra da lei; e con Xacio Baño, director de Trote, outra das grandes triunfadoras da noite, con cinco galardóns.

Unha ‘vueltina’ ao cotiá e ao pop. Revisamos a traxectoria de ‘Pauline en la playa’

Dende o Xixón Sound, dende Undershakers a hoxe, revisamos a traxectoria de Pauline en la playa nos 20 anos do grupo das irmás Alicia e Mar Álvarez, que actúan o 8 de marzo en Ourense.

[09:48:00] Estréase na Coruña ‘Liberto’, unha montaxe de Marelas Teatro

Conversamos con Tamara Canosa, directora desta montaxe protagonizada por Rocío González, Cris Iglesia e Lucía Aldao.

[09:31:00] ‘A sombra da lei’, recoñecida con dez premios Mestre Mateo

O filme protagonizou a noite en canto a premios e ausencias. Trote recibiu cinco Mestre Mateo. Repasamos a gala dos premios da Academia Galega do Audiovisual.

Aberta a inscrición nos VI Premios Martín Códax da Música

Ata o 17 de marzo está aberta a inscrición nos premios da música galega. Conversamos coa presidenta da Asociación Músicas ao vivo, Sonia Lebedinsky.

Inaugúrase a Casa-Museo de Álvaro Cunqueiro en Mondoñedo

Neste espazo cultural imos ata Mondoñedo, onde hoxe é a inauguración da Casa-Museo de Álvaro Cunqueiro. O lugar onde o escritor viviu máis de tres décadas, onde xurdiron as súas letras e onde os visitantes poden achegarse ao mundo fascinante dun escritor galego, pero tamén universal.

Unha casa onde Álvaro Cunqueiro escribiu obras como Merlín e familiaAs crónicas de Sochantre e Se o vello Sinbad volvese ás illas. Dende o seu cuarto, o escritor tiña vistas ao gran rosetón da catedral de Mondoñedo, que hoxe é Patrimonio da Humanidade.

Xosé Manuel Salgado foi responsable de representar toda a esencia do escritor na casa e trasladar os visitantes a un pequeno anaco do mundo cunqueiriano.

“Falei con moita xente e tratei de entender en profundidade a vida e obra do escritor”, asegura.

Voces como a de Armando Requeixo, Darío Villanueva, Víctor Freixanes e Marina Mayoral compoñen un retrato do escritor na casa.

Cineclub A Lanterna, en Viana do Bolo

Falamos de cine co promotor do cineclub A Lanterna de Viana do Bolo, Román Vilela

O Entroido de Viana do Bolo

Falamos do Entroido de antes e de agora coa xente de Viana do Bolo

Lugo recordará a Narf no Círculo das Artes

Unha ducia de artistas recordan a Fran Pérez ‘Narf’ no Círculo das Artes de Lugo. O espectáculo Encontrarte reúne poesía de Lois Pérez, videocreación a cargo de Xavier Belho e cun gran número de músicos como Sérgio Tannus, Marcos Teira, Iria Estévez e Gonzo Piña, García Mc, Brais Morán, Alejandro Vargas, Adrián Costa e Sergio Zearreta.

Alí tamén estará Uxía, con quen falamos neste espazo cultural. “Vai ser unha noite cunha atmosfera única”, conta.

“Tiña unha forma única de entender a escena”, recorda Brais Morán.

Compostela, a cidade onde descubrimos as orixes da fotografía

Se paseamos pola zona vella de Compostela no ano 1856 descubrimos o primeiro estudio fotográfico permanente de Galicia, aberto polo fotógrafo Andrés Cisneros.

O Consorcio de Santiago e a Editorial Alvarellos publican o libro As orixes da fotografía en Galicia, unha investigación do fotohistoriador Carlos Castelao.

Os pintores da época viron a chegada da fotografía como unha ameaza para o seu oficio, así que a maioría deles convertéronse en fotógrafos por necesidade.

“Co ascenso da burguesía de finais do século XVIII e principios do século XIX, todos querían obter unha imaxe de si mesmos”, explica o investigador.

Aínda que Andrés Cisneros foi o primeiro, houbo outro fotógrafo que acadou gran éxito entre a sociedade picheleira da época. El foi Juan Palmeiro.

Nun oficio en que as mulleres tamén eran silenciadas, dúas delas loitaron contra o establecido e puxeron en marcha os seus propios estudos na cidade compostelá. María Cardarelly aprendeu no estudio de Juan Palmeiro e foi a autora das dúas primeiras fotografías coñecidas de Rosalía de Castro. Outra das fotógrafas pioneiras foi Juana Cabello.

Pin It on Pinterest