Destacados

Contos de aquí e acolá en Pontevedra

Pontevedra acolle ata o bado o encontro internacional de contadores de historias Sete Falares. Conversamos cos organizadores, o grupo Pavís Pavós, e con María da Pontragha, unha das contadoras participantes nestas sesións, que se desenvolven na antiga igrexa de Santa Clara. 

Toponimízate: falar dos nomes da nosa terra

Volve a campaña ‘Toponimízate. Falámosche dos nomes da túa terra’ da RAG, que este ano percorrerá 17 concellos: Pantón, Sada, Laza, Chandrexa de Queixa, A Fonsagrada, Covelo, Castrelo de Miño, Rodeiro, Fisterra, Ortigueira, Allariz, Oleiros, Ponteareas, Forcarei, Zas, Guntín e O Incio.

 

 

Los Bravú, clásicos e contemporáneos

A salmantina Dea Gómez e o marinense Diego Omil forman o equipo artístico Los Bravú desde hai unha década. Aínda que empezaron traballando no ámbito na banda deseñada, hoxe usan principalmente a pintura figurativa para explorar os temas da contemporaneidade inspirándose nos mitos e a pintura clásica.  Ata o 26 de xuño Los Bravú expoñen na galería Trinta de Santiago a mostra ‘Liminal’.

‘A educación sentimental’, de Flaubert, por fin en galego

A editora Hugin e Munin publica en galego este clásico de Gustave Flaubert co que nace a novela moderna.  Un retrato xeracional a partir da peripecia de Frédéric Moreau, un mozo que chega a París en 1840, e ve frustrarse as ilusións amorosas, políticas e sociais. Coñecemos as claves d´A educación sentimental coa súa tradutora, Isabel Soto. 

Nace en Vigo ‘Banda á feira’

Na fin de semana do 4 e 5 de xuño nace un novo evento de cómic en Galicia: ‘Banda á feira’, unha festa da banda deseñada no barrio vigués do Calvario. Entre os convidados, Anabel Colazo, Carles Dalmau, Mayte Alvarado ou Borja González. Coñecemos esta nova festa da banda deseñada cun dos seus organizadores, Félix Rodríguez.

Visitamos a primeira xornada do Portamérica

Comeza a temporada estival de festivais de música co Portamérica, que trae a Caldas de Reis a música de Xoel López, Nathy Peluso, Baiuca ou Rozalén. Conversamos con dani e con Fon Román, dous dos artistas galegos que participan  na primeira xornada do festival.

Ledicia Costas, premio Lazarillo: “As nenas e nenos agasállanme coas súas lecturas todos os días”

Ledicia Costas empezou a escribir de adolescente, e aínda que a carreira de Dereito se lle cruzou no medio do camiño, ela seguiu escribindo. Ata que a Ledicia escritora foi aos poucos substituíndo á avogada. Un paso arriscado, pero que con moito traballo se resume nunha carreira literaria meteórica, 20 obras publicadas e premios como o Nacional de Literatura Infantil e Xuvenil, o Merlin, o premio da Cultura de Galicia de Creación Literaria, e ata tres premios Lazarillos, como vimos de saber hai un par de días. Este último por unha novela xuvenil, ‘A lebre mecánica’, que poderemos ler en galego nuns meses.

Ledicia escribiu literatura infantil, xuvenil e novela e relatos para adultos. Escribiu sobre a guerra en ‘Un animal chamado neboa’, un libro que tamén nos fala da dor e da resistencia, ao igual que ‘Infamia’ e ‘Golpes de luz’, o máis recente para adultos. Pero Ledicia é unha auténtica superestrela entre as nenas e nenos. Ninguén coma ela lles fala á cara, directamente na súa linguaxe, de inframundos, cociñeiras defuntas, mulleres planta, vampiras, unicornios, minimortos ou nenos de lume. Ninguén con tanta paixón, tenrura, humor e intelixencia. Así é a literatura de Ledicia Costas.

Boyanka Kostova volven con ‘Ranaeira’

Os pioneiros do trap galego presentan o seu cuarto traballo, con colaboracións de Dios ke te Crew,
FØ Records e Pili Pampín. 

A Rosalía lírica e ética de ‘En las orillas del Sar’

“A través del follaje perenne / que oir deja rumores extraños / y entre un mar de ondulante verdura / amorosa mansion de los pajaros / desde mis ventanas veo / el templo que quise tanto”.

Con estes versos comeza ‘En las orillas del Sar’, o derradeiro libro de Rosalía de Castro, publicado en castelán, en Madrid no ano 1884. Un deses clásicos fundamentais, de difícil clasificación, no que Rosalía escribe sobre o seu tempo, evocando a esa forza da natureza que discorre ‘en las orillas del Sar’ con moita sinxeleza. Recuperámola hoxe aquí porque a editorial Alvarellos acaba de publicar unha edición facsimilar do poemario, tal e como foi publicado en 1884.

Con el podemos recuperar a lectura dun nos nosos grandes clásicos, aínda que non suficientemente reivindicado pola literatura galega. No Diario Cultural falamos co editor, Henrique Alvarrelos, e a autora do limiar, María do Cebreiro.

 

 

‘Demasiado’, o novo disco de Radio Zapa

Vituco Neira parola con Martín Zapata, un dos integrantes do trío de power-pop Radio ZapaOs seus próximos concertos: 4 de xuño en Lalín e 10 de xuño en Santiago. 

Pin It on Pinterest