Diario Cultural

Ruth Matilda Anderson e o traxe galego: un camiño desde a tradición á modernidade

Na década dos anos 20 do século pasado a fotógrafa e investigadora estadounidense Ruth Matilda Anderson chegou a Galicia como enviada da Hispanic Society of America. A súa misión era retratar as vestimentas tradicionais, as empregadas para traballar e as dos días de festa. Hoxe, as súas imaxes representan unha fonte importantísima de información da forma de vida da Galicia rural e urbana daquel tempo.

Imos ata o Museo de Pontevedra, porque alí pódese ver ata o 16 de outubro a mostra ‘Ruth Matilda Anderson. Unha viaxe pola indumentaria tradicional de Galicia’, que reúne as fotografías de Anderson cos traxes recuperados e contextualizados pola Asociación Etnográfica Sete Espadelas. Na mostra podemos observar os anos nos que Galicia transicionaba entre a tradición e a modernidade, prestando especial atención ao traxe feminino.

 

 

Podcast ‘Diario Cultural’ das 10:30

Imos coñecer un pouco mellor o noso país a través dos topónimos que nos trae cada martes de verán o noso colaborador Vicente Feijoo. Pero antes, facemos un percorrido pola moda, desde o traxe tradicional ata o máis artístico.

‘Neve en agosto’, primeiro poemario de Nieves Neira Roca

Este primeiro poemario de Nieves Neira Roca alude ás nevaradas fóra de tempo para falar do inesperado, do extraordinario. Con ecos de Uxío Novoneyra ou de María Gabriela Llansol, da filosofía zen ou do misticismo sufí, o libro recolle o asombro que producen a beleza e a enerxía da natureza. ‘Neve de agosto’ está publicado na colección Sentulo da editorial Chan da Pólvora. 

Furafollas, de Barcelona a Córgomo

Conversamos con Anxo Baranga e Blanca Cotado, dous dos membros de Furafollas, un grupo de afeccionados que usa o teatro como plataforma cultural galega en Barcelona desde 1997. O grupo foi pioneiro en reivindicar as Letras Galegas para Delgado Gurriarán e este venres e bado volven a Córgomo para realizar dúas accións teatrais, ‘Teatro encontro con Florencio Delgado Gurriarán’ e ‘Taberna canto conto’.

Unha ponte internacional ocupada por pianos dá comezo ao IKFEM

Unha noite de verán de 2017, a ponte internacional entre Tui e Valença pechou ao tráfico para abrir á musica. A organización do festival IKFEM levaba ata ese espazo en suspensión sobre o rio Miño a un grupo de pianistas, ofrecendo un concerto en simultaneo. É unha das imaxes que mellor representan a razón de ser do IKFEM, o festival internacional de intrumentos de teclado: ser ponte musical entre países.

Agora, en 2022, 5 anos despois, repiten experiencia. Hoxe a ponte internacional está pechada e  encherase de música, literalmente: 10 pianos ocuparán todo o longo da ponte. Tocando, estarán 20 pianistas: galegos, portugueses, españoles e unha ucraína, Marta Bachek.

Falamos coa súa directora, a pianista Andrea González, deste festival que encherá de música a eurocidade do 19 ao 26 de agosto con concertos gratuitos.

 

Podcas ‘Diario Cultural’ das 10:30

Ciencia e literatura da man de Estibaliz Espinosa, que sempre nos sorprende coas súas propostas. E música. Falamos coa pianista Andrea Gonzalez, que dirixe o festival IKFEM da eurocidade Tui – Valença do Minho. Comeza hoxe a 10ª edición cun concerto de 20 pianistas na Ponte Internacional.

O pandeiro de Concha do Canizo

Concha do Canizo, da Gudiña, foi unha das últimas tocadoras de pandeiro, antes de que este instrumento cadrado desaparecese das foliadas. Gran virtuosa e transmisora dun enorme repertorio, gravárona tocando desde musicólogo estadounidense Alan Lomax a compiladores e músicos galegos como Xabier Díaz, Leni Pérez ou Xisco Feijóo.
Conversamos coa etnomusicóloga Xulia Feixóo, autora do libro Concha do Canizo. Este pandeiro que toco..que explica a importancia da súa figura e recolle algunhas desas gravacións.

Pin It on Pinterest