Diario Cultural

Ourense xa ten club de lectura de cómic

Esta semana reúnese por primeira vez o club de lectura de cómic da biblioteca pública de Ourense. A banda deseñada está cada vez máis presente nas bibliotecas galegas, onde os cómics adoitan estar entre as lecturas máis demandadas. Conversamos con María Benítez, a bibliotecaria que coordina este novo club de lectura e coñecemos un club veterano, o da Coruña, no que participa desde 2012 Alberto Ose.

O galego máis alá das fronteiras xeográficas

A próxima reforma do Estatuto de Autonomía de Asturias abriu o debate: debe ser o asturiano lingua oficial da comunidade? É unha reivindicación xa antiga dos asturianos, e agora por primeira vez, o partido no goberno en Asturias defende a súa oficialidade e mesmo usa a llingua con normalidade, ao igual que o medio millón de falantes en toda a comunidade. Do mesmo xeito, xorde o debate arredor do galego en Asturias, o galego asturiano ou o que algúns denomean “eonaviego”.

O que naceu como galego-portugués é unha lingua que foi permeando territorios e que non entende de fronteiras xeográficas. Fálase en Asturias, en León e mesmo en zonas de Extremadura. Queremos coñecer mellor ese galego que se fala máis alá de Galicia. Os nosos convidados de hoxe son Rosario Álvarez, presidenta do Consello da Cultura Galega e investigadora do Atlas Lingüístico Galego; e Henrique Costas, profesor da Universidade de Vigo especializado en dialectoloxía.

 

 

Podcast ‘Diario Cultural’ das 10:30

Sabemos que o galego é unha lingua universal, que nos conecta con milleiros de falantes en todo o mundo, que nos une coa lusofonía… pero tamén con Asturias, con León ou mesmo con Extremadura. Hoxe queremos saber máis destas variantes. Sabemos que o galego de Asturias está ademais no centro da polémica pola cuestión da súa oficialidade, así que falaremos con dous expertos como son Rosario Álvares e Henrique Costas.

E despois, tempo da literatura máis nova con Armando Requeixo.

50 anos de Fuxan os ventos

En xaneiro de 1972 un grupo de mozos lugueses que facían música xuntos decidiron crear un conxunto de folk. En outono dese ano gañaron o festival das San Lucas de Mondoñedo coa canción ‘Fuxan os ventos’ que acabou dándolle nome á agrupación. Falamos do aniversario con Xoán Fuertes Saavedra, un dos membros fundadores, e co libreiro lugués José Manuel Valín, que expón no seu escaparate unha pequena mostra de vinilos, casetes, carteis e fotografías do grupo.

O legado de Camilo José Cela no 20 aniversario da súa morte

O 17 de xaneiro de 2002 falecía en Madrid o escritor, o Premio Nobel de literatura galego, Camilo José Cela. 20 anos da morte dun dos escritores máis relevantes das letras españolas, renovador da literatura de posguerra, que foi tamén editor e promotor literario. Con esta celebración, e tamén co 80 aniversario da súa primeira gran novela, ‘La familia de Pascual Duarte’, recuperamos o legado literario de Camilo José Cela. Unha data que pode servir para coñecer mellor a súa obra e achegala a novas xeracións de lectores.

No Diario Cultural, conversamos con dous grandes coñecedores da figura e obra de Cela, como son a filóloga e profesora da Universidade da Coruña, Olivia Rodríguez, e o escritor Xosé Carlos Caneiro.

 

 

 

Podcast Diario Cultural das 10:30

Un día importante para a cultura en Galicia e tamén no resto do país, porque conmemoramos o 20 aniversario da morte de Camilo José Cela, o noso premio Nobel de Literatura. No diario temos de convidados a dous bos coñecedores da súa obra e da súa figura, como son a catedrática da Universidade da Coruña Olivia Rodríguez e o escritor Xosé Carlos Caneiro.

E logo, tempo para a música clásica con Luis Miguel Crespo, que nos comentará a programación da Orquestra Sinfónica de Galicia para os vindeiros días.

‘Agromantes’, cine sobre saúde mental en primeira persoa

O proxecto ‘Agromantes’ nace dun laboratorio de cine organizado ao abeiro do GAM Compostela, un grupo de axuda mutua de persoas con diagnósticos psiquiátricos. O proceso deu como resultado seis curtametraxes nas que se fala en primeira persoa do sufrimento psíquico, das dificultades da vida cotiá, a relación coa familia ou os efectos do tratamento farmacolóxico.

Falamos de Agromantes antes da súa estrea en Santiago con Cora Peña, a coordinadora do laboratorio, e Patricia Rey. 

Pin It on Pinterest