Radio Galega

‘As Bestas’ chega aos cines este venres

‘As Bestas’ inspírase na historia de Martin Verfondern, un home holandés asasinado por veciños na aldea de Petín na que se instalara. Conversamos co actor galego Diego Anido, un dos protagonistas do filme, e co seu director, Rodrigo Sorogoyen.

Máis preto de saber se Cristóbal Colón era galego

O discurso oficial dinos que Cristobal Colón naceu en Xénova, que foi mariño, cartógrafo e gobernador xeral das Indias Occidentais, desde que un 12 de outubro de 1492 puxo pe nas Bahamas, nun continente ata o momento descoñecido para Europa. Pero desde o século XIX, diversas voces apuntan a unha posible orixe galega, que é o que agora leva á Universidade de Granada a procurar a súa pegada xenética na provincia de Pontevedra. Os traballos estanse realizando coa colaboración estreita da Asociación Colón Galego Celso García de la Riega, que preside Eduardo Esteban: “sabemos que Colón era galego, e só queda agardar a que os traballos en Poio e Vilaxoán nos achegen as probas”.

Entre as moitas teorías que hai sobre a identidade de Colón, hai quen apunta a Pedro Álvarez de Soutomaior, Pedro Madruga. Historiadores como Suso Vila negan esa relación, pero reivindican a figura política esencial que representaron os Soutomaior na historia da Galicia e da Castela da época.

 

 

Comeza o XXXII Festival Internacional de Jazz de Lugo

O Festival de Jazz de Lugo, que se desenvolve en tres escenarios da cidade ata o 20 de novembro, lembrará a Tete Montoliu no ano do 25 aniversario do seu falecemento

Ofelia Rey Castelao, Premio Nacional de Historia de España

Conversamos coa catedrática de Historia Moderna da USC sobre a obra galardoada, ‘El vuelo corto. Mujeres y migraciones de la Edad Moderna’, na que saca á luz a importancia das migracións femininas entre os séculos XV e XVIII. O libro analiza tamén as consecuencias da emigración masculina para as mulleres que quedaban.

Cafés e moita arte na galería Solaina de Lugo

O café invita a reunión, a sentar na mesa e falar, a espantar o frío e todos os males. Gústanos tomar café na casa pero tamén fóra, quedar nunha cafetería coas amizades. Aos donos dos bares non lles ha parecer moi ben, pero cun café podes tirar horas falando. Así, non é extraño que durante moito tempo, estes cafés foran lugar de reunión de artistas ou escritores para conversar e debater. Unha institución nacional é o Café Gijón de Madrid, ou o Derby compostelán, e seguro que en cada cidade e vila hai unha referencia semellante.

Agora debatemos menos, moitos destes cafés foron pechando… Pero hoxe queremos recuperar o seu espíritu e para iso visitamos Lugo. Non un café, senón unha galería de arte: Solaina, que dirixe Sergio Marey. O segundo martes de cada mes, comezando hoxe, propón os encontros artísticos-culturais na Solaina arredor dun café.

 

 

‘Tres pés para un Suso’, nova vida para as cancións de Suso Vaamonde

Roberto Sobrado, Xosé Constenla e O Leo forman Tres pés. Unha alianza de cantautores heterodoxos que reivindica o cancioneiro de Suso Vaamonde no disco ‘Tres pés para un Suso’. 

Pin It on Pinterest