Radio Galega

Especial do Diario Cultural dende Culturgal

Hoxe o Diario Cultural esténdese na tarde nun programa especial dende a feira da cultural galega, o Culturgal!

Falamos co director do Culturgal, Xosé Aldea; con Pepe Cunha, o comisario da exposición Cantámola en galego; temos dose extra de teatro co director do Centro Dramático Galego, Fran Núñez, con Cándido Pazó e con Marta Pazos, e metémonos en faladoiro literario coas editoriais Apiario, Irmás Cartoné e Kalandraka.

E entre prato e prato, como non sempre a montaña vai a Mahoma, Vituco Neira encárgase de achegarse ós diferentes postos desta gran feira da cultura galega.

Todo isto e máis cabe neste especial do Diario Cultural dende Culturgal.

Viaxe ao espazo interior de Berto

Berto con B é Berto Mira, un dos Verto con V. Hoxe debuta en solitario con este disco, ‘Viaxe ao espazo exterior’, logo de converterse nun dos fenómenos da música pop en Galicia xunto ao seu compañeiro Fer. Xa sabemos que Verto con V decidiran facer un parón nos seus concertos, pero mentres agardamos, temos xa con nós este novo disco.

11 cancións intimistas que xogan co Rnb, o Techno, o lo-fi ou o Bedroom Pop. Un traballo que explora de maneira conceptual o gran problema da saúde mental na xuventude, e no que está acompañado por Toni Martelo, Hevi de Malandrómeda e Fer, compañeiro no proxecto VERTO. 

 

 

 

 

Podcast ‘Diario Cultural’ das 10:30

Desde esta madrugada está dispoñible en plataformas dixitais ‘Viaxe ao espazo interior’, primeiro disco en solitario de Berto, a metade do grupo Verto.

Ese é o acontecemento cultural do día, pero non nos esquecernos da literatura infantil e xuvenil, como cada venres, con Montse Pena Presas.

Imperfectas e feministas

Chegan ás librarías galegas dous libros tan feministas como irreverentes. Hércules de Ediciones publica na súa colección Púrpura Mala feminista, unha colección de ensaios da estadounidense Roxane Gay, e Rinoceronte Editora achega a novela Como ser famosa, da xornalista inglesa Caitlin Moran.

‘Pava’, o traballo musical de Lucía Aldao: “Outra pava”

Pava é o que queda mentres se vai esgotando un cigarro. Pava é tamén unha forma de chamar a unha moza. Ademais da femia do pavo, non nos olvidemos desa acepción. Pero a partir de hoxe, ‘PAVA’ é tamén o título do primeiro proxecto musical en solitario de Lucía Aldao. O primeiro disco logo de 20 anos nos escenarios coa música e a poesía a voltas.

 Desde este 25 de novembro está dispoñible en todas as plataformas dixitais este ‘Pava’ de Lucía Aldao.

 

 

Podcast ‘Diario Cultural’ das 10:30

Desde as 00.00 temos nas plataformas dixitais o primeiro disco en solitario da poeta coruñesa Lucía Aldao. O disco chámase ‘PAVA’, como a do cigarro; e como dedicatoria leva escrito: “A ningún pavo”. Xa veremos que significa isto, e sobre todo, como soa Pava.

Máis temas: para quen queira ir ao cine nesta fin de semana, que ten pinta de que vai chover a cachón, atentos a Moncho Lemos, que nos comentará as mellores estreas da carteleira.

‘U-las palabras’, novo disco de Antilia

A cantante e actriz María Costas e mailo guitarrista José Churruca forman Antilia, un grupo de música atlántica que bebe do rock, do jazz e do blues, e no que a voz e a guitarra son protagonistas. Presentáronnos o seu segundo disco, ‘U-las palabras‘, que presentan esta fin de semana en Culturgal e o 18 de decembro no Museo de Pontevedra.

Pin It on Pinterest