Radio Galega

30 anos da Orquestra Sinfónica de Galicia

A temporada musical que está rematando foi a número 30 para a Orquestra Sinfónica de Galicia. O conxunto coruñés deu o seu primeiro concerto un 15 de maio de 1992. Por moitas razóns, este 2022 foi un ano emotivo, marcado polo regreso ao Pazo da Opera, despois da pandemia, e por momentos coma no que o director de orixe rusa, Dima Slovodeniuk, dirixía á orquestra en Cuenca tocando o Himno ucraíno.

Para Dima foi tamén un ano especial, o seu último á fronte da Sinfónica, na que leva desde 2013, así que imaxinamos que este fin de curso chega cheo de emocións para a gran familia de músicos que conforman o universo da Orquestra Sinfónica de Galicia. Mañá despiden temporada cunha xornada de portas abertas na súa casa, no Pazo da Ópera da Coruña, desde as sete e media da tarde. Con moita música, claro, na que participarán todas as formacións, desde o Coro e a Orquestra Infantil, ata as principais.

Como foi este ano de celebración e a que futuro mira a Orquestra? Preguntámosllo a Andrés Lacasa Nikiforov, xerente do Consorcio para a Promoción da Música da Coruña.

 

 

Podcast ‘Diario Cultural’ das 10:30

Falamos con Andrés Lacasa, xerente da Orquestra Sinfónica de Galicia, que este venres celebran unhas xornadas de portas abertas polos 30 anos da Orquestra. E Moncho Lemos achéganos as estreas de cine: ‘Lightyear’ e ‘A brigada da cociña’.

O legado do exilio

O Consello da Cultura Galega organiza as xornadas ‘Legados dende a dislocación‘, dedicadas a reflexionar sobre o exilio desde o presente e proxectándose no futuro. Falamos co coordinador da xornada, Pablo García Martínez, e mais co músico e investigador Samuel Diz, que participa cun concerto dedicado ás músicas do exilio republicano a través das figuras de dous músicos galegos exiliados en México: Bal y Gay e Xesús Dopico. 

Animación galega no festival de Annecy

Conversamos con Alberto Vázquez, que estrea a súa esperadísima longametraxe ‘Unicorn wars’ no festival de Annecy, o principal certame de cine de animación no mundo. Escoitamos tamén Xosé Zapata, un dos coprodutores de ‘Os demos de barro‘, que tamén se proxecta na sección ContreChamp de Annecy.

Pin It on Pinterest