En “Memoria da melancolía” o guitarrista e investigador Samuel Diz homenaxea á escritora e activista feminista María Teresa León. Un percorrido pola súa autobiografía a través de composicións musicais orixinais da xeración do 27′ e o exilio republicano español gravadas efectivamente coa guitarra de Federico García Lorca.

Samuel Diz tomou como folla de roteiro a autobiografía de María Teresa León, visitando deste xeito as cidades que ela habitou e as rúas que pisou, finalizando co encontro con Aitana Alberti León, a filla de María Teresa con Rafael Alberti, para pedirlle o permiso emocional da persoal homenaxe que lle quería render á súa nai neste traballo.

Por outra banda, a prática totalidade dos nomes propios que integran este disco viviron o exilio republicano de 1939, un fito que marcou a vida de María Teresa León. Á súa morte, a súa filla diría dela que, de ter nacido home, sería considerado un dos máis grandes da historia. No estatus, sería o caso, do seu grande amigo Federico García Lorca, con quen tan boa e tenra relación gardaba.

A publicación do músico galego complétaa toda a investigación realizada e achegas inéditas do propio Samuel Diz que están recollidas nun amplo libreto que acompaña ao disco.

O pintor Edu Albo (A Coruña, 1971) presenta os seus últimos traballos en Santiago de Compostela da man da Galería Luisa Pita.

Edu Albo define a súa obra como “realismo conceptual” e caracterízase por abrazar unha idea  tardomorandiana da arte, buscando a esencia dos obxectos e tratando que o espectador se tope co especular fronte aos seus cadros. Apélase desta forma á memoria visual e cognitiva do público, xerando así unha moi contemporánea riqueza discursiva.

Sarabela Teatro estrea ‘A lingua das bolboretas’ de Manolo Rivas no Auditorio de Ourense. O espectáculo está dirixido por Gonzalo Guerreiro que fixo a dramaturxia do relato xunto a outro do propio Rivas: A traxectoria do Balón. Ademais conta con referencias de Rivas con textos e cancións de Fernando Dacosta

Hai cen anos abría as súas portas na rúa Nova de Santiago de Compostela o Salón Teatro, sede hoxe do Centro Dramático Galego.

Mais no tempo da apertura, era un proxecto promovido pola Liga da Mutua de Señoras de Santiago. Un teatro destinado a acoller os actos e festas dos colexios católicos da elite económica da cidade, onde a lingua vehicular non era outra que os castelán. Porén, aquilo mudaba polas noites.

Agora, para conmemorar este centenario, o Centro Dramático Galego organiza os Mércores de Varanda, que xa está a dar lugar a concertos semanais entre os meses de setembro e outubro.

Vertixe Sonora Ensemble, interpretará na Sala Mozart do Auditorio de Galicia obras presentes na mostra Mirar o Son, que abre coa actuación desta agrupación especializada na creación musical máis actual.

A actuación está ligada por máis cousas có repertorio a esta exposición, que leva o título de “Mirar o son. Notación gráfica na música contemporánea”.

Esta fin de semana a Eurocidade Tui – Valença continúa a celebrar diferentes actividades, ao abeiro das Xornadas Europeas da Cultura Xudía, para a divulgación do amplo patrimonio vinculado á presenza histórica da comunidade xudía en ambas cidades transfronteirizas.

O programa abrangue diversas visitas que por mor das prescricións sanitarias derivadas da COVID-19, consisten nunha explicación detallada de diversos aspectos relacionados coa presenza xudía, tanto en época medieval como nos séculos XVI e XVII. Posteriormente os asistentes poderán realizar unha visita auto guiada polo patrimonio xudeu conservado en ambas localidades.

Marzo de 2016, en plena guerra de Siria, a cidade de Alepo está dividida en dúas partes enfrontadas. No lado rebelde, a activista Amira loita por informar o mundo desde dentro da guerra e visita un orfo rescatado baixo os cascallos; no lado do réxime, Isam, un químico que traballa nunha fábrica de xabón, teme a notificación do Goberno para engrosar as filas do exército. Ao mesmo tempo en Bruxelas, días antes do atentado terrorista de Zaventem, Alicia topa indicios desacougantes que a fan temer pola vida da súa parella.

Antón Riveiro Coello é o autor desta novela tecida a partir destas tres historias, unha novela envolvente, na liña do autor, escrita dende o interior de personaxes que atravesan o horror cos ollos abertos e buscan un exorcismo na loita, no exilio ou no compromiso solidario. Intentos deseperados de axustaren toda a dor á expectativa dunha reconstrución.

Tomar decisións sen distraerse. 5 cancións creadas en tempo presente para 5 fotografías. Porque arestora, máis ca nunca, tócanos estar presentes. 

Hai tempo que admiro a creación poliédrica de Benxamín. A súa música e as súas fotos, con eses títulos esenciais no conceptual. A proposta para este proxecto foi escoller cinco das súas fotografías (con cadanseu título), fecharnos nun estudio e crear no momento presente a paisaxe sonora, a música para cada unha das súas imaxes.

O proceso deste EP é un acto creativo en acción, en tanto que cada escolla, cada nota, se apreixou desde a presenza na consciencia. Cada vez fascíname máis a vivencia de que a voz ou o teu instrumento sabe perfectamente o que quere comunicar, só hai que renderse. 

A edición número 13 do Festival Internacional de Curtametraxes de Bueu (Pontevedra) está a ofrecer nesta semana o mellor cinema en formato curto do panorama internacional.
A FIC de Bueu está a proxectar distintas curtas durante a semana. As tardes gardan unha estrutura semellante de luns a venres, xa que ás 16, ás 18, ás 20 e ás 22 horas se desenvolverán as proxeccións dos cinco bloques da Sección Internacional.

O festival Plataforma acolle hoxe a estrea de “SET”, un espectáculo de Paula Quintas e Nacho Muñoz

No seu segundo día, o festival de artes performativas Plataforma esgotou as entradas para a presentación de “SET”, o espectáculo de danza contemporánea e música electrónica en directo que Paula Quintas e Nacho Muñoz estrean baixo a dirección de Rut Balbís. 

Con esta peza, os artistas abordan os novos comportamentos e cinética social pola covid. Unha peza que, nun principio, ía ser de contacto e participativa e que agora deberá ser máis virtual.