Eva Mejuto tráenos hoxe dous álbums ilustrados recén editados. ‘Monstr3s’ é o primeiro libro como escritora de Laura Parrula, editora en Patas de Peixe. Coas ilustracións de Óscar Villán, o libro mestura humor e medo. ‘Illas á vista’, de Rena Ortega, está dedicado ao parque nacional das Illas Atlánticas. A medio camiño entre a crónica e o caderno de viaxes, publícao Triqueta Verde.

Eva Mejuto fálanos hoxe deste álbum editado da peruana Fabiola Anchorena, publicado pola editorial Kalandraka. Unha obra fermosa e dura sobre a destrución que crean os incendios, que recibiu o primeiro premio Nacional ao libro mellor editado na categoría de literatura infantil e xuvenil.

Eva Mejuto tráenos hoxe libros que falan sobre a primeira etapa da vida. O primeiro é A canción do cambio. Un himno á infancia, un álbum ilustrado a partir dun poema da escritora estadounidense Amanda Gorman, ilustrado por Loren Long e traducido ao galego por Ivonete da Silva e Fe González para Hércules de Ediciones. O segundo é un ensaio do pedagogo italiano Francesco Tonucci, Por que as nenas e os nenos, sobre as contradicións da nosa sociedade na educación da rapazada. 

Eva Mejuto tráenos hoxe dous libros con música. Diferentes diferenzas é o primeiro libro de contos da cantautora Silvia Penide, ilustrado por Emilio Urberuaga e publicado por Bululú.  A partir do libro naceron as cancións, dispoñibles en CD e en formato dixital. E acaba de publicarse o último traballo de Magín Blanco, Caderno de cores e cancións, ilustrado por Sonia  García, e que inclúe un código QR para acceder á música. Nas cancións colaborou o alumnado do CEIP da Carrasqueira de Coruxo e a asociación de familias con persoas con parálise cerebral APAMP.

Seguimos repasando con Eva Mejuto obras finalistas dos premios Follas Novas dirixidas ao público infantil e xuvenil. Desta vez, o ‘Animalario de ler a diario’, un poemario divertido e cheo de bichería escrito por Eduard Velasco e mais  a banda deseñada ‘Roxín Roxal. A daga do conde’, de Manel Cráneo e Brais Fierro, publicado por Demo Editorial.

Eva Mejuto tráenos dúas lecturas coas que aprendemos a contar de maneira divertida. O libro grande dos números pequenos (Edicións Xerais) é o primeiro álbum que asina Berta Dávila, ilustrado por Gastón Caba, apréndenos a contar do un ao vinte con rima e ritmo. O libro dos cus (Nube Ocho), de Eva Manzano e Emilio Urberuaga, traducido ao galego por Maruxa Zaera, é un libro divulgativo sobre os cus  humanos e animais con moitos pormenores interesantes e divertidos sobre os traseiros. 

Celebramos o aniversario da editora Kalandraka, que acaba de facer 25 anos publicando literatura infantil e xuvenil, e mais de Embora Edicións, que fai 30 anos e ten unha colección dedicada á LIX. A primeira lectura que propoñemos hoxe é ‘Verme’, un libro acordeón sen palabras que nos leva ao fondo da terra, da autoría de Federico Fernández e Germán González. A segunda, ‘Violeta Parapluie’, un álbum de poesía cunha galería de personaxes estrambóticos, escrito por Ramón D. Veiga e debuxado por Iván R. As dúas obras son finalistas nos premios Follas Novas do libro galego na categoría de álbum ilustrado.

Eva Mejuto escolle dúas lecturas para o Día da Visibilidade Trans. Nom estamos quebrades, de Nee Barros, está protagonizado por Eva, que sente a presión do contorno por encaixar no seu xeito de relacionarse cos demais e na súa sexualidade. Unha novela sobre a amizade e o valor da diferenza que gañou o premio María Victoria Moreno de Literatura Xuvenil. Resúltame familiar é un álbum ilustrado que propón un percorrido actual sobre as formas de vivir en familia.