Todas as colaboracións

Muxos en Malpica

Esta semana Armando Requeixo convida á lectura de Muxos, a recente novela de Héctor Pose.

Muxos (Hércules) é un relato protagonizado por un adolescente orfo de pai e mais súa nai, que é a narradora desta historia ambientada en terras de Malpica, coas Illas Sisargas ao fondo e o mar como un personaxe máis.

O mozo Venancio, nacido cunha importante afectación médica, ten un don: é quen de adiantar acontecementos que han determinar a vida das xentes mariñeiras da contorna. Pero iso non fai máis que agravar a súa consideración de toliño solitario para os parroquianos. Súa nai loita contra esa exclusión social ao tempo que recompón o seu corazón mancado tras a perda do home, camiña, escribe e tenta sobrevivir ao temporal eterno das relacións humanas que a cercan.

 

 

Irene Montero estréase na literatura con ‘Lúa Nova’

Esta semana Armando Requeixo fálanos de Lúa nova, a novela coa que se estrea literariamente Irene Montero.

Lúa nova (Xerais) obtivo o VIII Premio de Novela Curta Cidade Centenaria de Ribeira, unha historia intensa e conmovedora protagonizada por unha pianista cega que ten que se enfrontar a un reto decisivo na súa vida.

As dúbidas, as dificultades e os medos de quen vive a súa condición de invidente tentando superar calquera obstáculo son as realidades que rodean a Lúa Lóngora, a protagonista desta historia chea de amor e música.

 

 

‘A unidade e a harmonía da realidade’

‘A unidade e a harmonía da realidade’

Armando Requeixo comenta ‘Fisterra. Relato curto en Galicia’

Esta semana Armando Requeixo convídanos á lectura de Fisterra. Relato curto en Galicia, unha ampla antoloxía do conto galego da que se responsabilizaron Xosé Manuel del Caño, Manuel Pato Vidal e Manuel Álvarez, compoñentes os tres da entidade cultural Amigos do Libro Galego. Arte e Letras, que é quen promove o libro.

Fisterra (Edicións Linteo) reúne corenta relatos de autoras e autores de diversas xeracións e estéticas, amosando un mostrario ben diverso das posibilidades da escrita contística na Galicia dos nosos días.

A variedade de temas e estéticas tratadas, a participación de voces senlleiras da nosa escrita que había tempo que non publicaban e o feito de seren todas historias rigorosamente inéditas fan deste volume unha achega de indubidable valor.

O tradutor de sombras, de Moncha Fuentes

Esta semana Armando Requeixo convídanos á lectura de O tradutor de sombras, a última novela de Moncha Fuentes.

O tradutor de sombras (Xerais) afonda nos abismos anímicos de Roque Corbal, un tradutor depresivo que se refuxia no alcohol e no traballo perfeccionista para escapar dun pasado familiar que lle resulta inaturable e que o psiquiatra que o trata lle di que ten que espaventar escribindo unha sorte de memorias. 

Ao longo destas páxinas imos facendo un percorrido por algúns dos episodios máis decisivos da nosa historia do pasado século da man dos recordos que, filtrados pola escrita terapéutica de Roque Corbal, van deitando para nós os seus familiares. Amor, loucura e morte nun relato intenso, cheo de matices psicolóxicos e escrito cunha prosa alabarante.

 

 

Armando Requeixo comenta “O negociador”

Esta semana Armando Requeixo convídanos á lectura de O negociador, a última novela de Miguel Sande, que foi finalista do Premio Xerais de Novela do pasado ano. Unha historia sobre un negociador que en Alxer ten que tratar de gañar tempo e liberar un secuestrado por ETA mantendo longos encontros cos seus captores. Un relato sobre a vida que se nos oculta, sobre o sentido dos silencios, sobre a identidade propia que descoñecemos, tamén sobre a memoria, os remorsos e a necesidade de comprender os porqués.

Relatos de Juan Andrés Fernández Castro con moita luz

Esta semana Armando Requeixo suxírenos ler Demasiada luz, o novo libro de relatos de Juan Andrés Fernández Castro.

Demasiada luz (Fervenza) é un conxunto de dezaoito relatos de tema, enfoque e estética varia que figuran prologados por Antonio Piñeiro.

Donos dunha ben fina prosa, coidada ata os últimos detalles, estas historias achégannos a mundos como o da emigración, o metaliterario, o paradetectivesco ou o nostálxico da infancia, sempre con descricións e diálogos traballados con esmero e cheos de poder evocativo, emotividade e lirismo.

 

 

Darío Xohán Cabana e ‘A música das palabras’

Esta semana Armando Requeixo convídanos á lectura dun interesante volume de ensaio: A música das palabras. De lingua e literatura (1990-2021), de Darío Xohán Cabana.

A música das palabras (Xerais) reúne máis de medio cento de ensaios breves que Darío Xohán Cabana foi dando a coñecer aquí e acolá ao longo dos últimos vinte anos. O libro, que deixou preparado pouco antes de se finar o pasado novembro, ve luz postumamente acompañado dun prólogo da súa filla, a filóloga Alexandra Cabana Outeiro.

Estes traballos percorren con fino espírito crítico gran cantidade de temas, entre os que salientan o mundo da tradución e da poesía, aínda que tamén poden atoparse textos sobre a novela histórica, os imaxinarios literarios ou a lexicografía e a dicionarística, entre outros.

 

 

 

Que farías por protexer o teu sangue?

Esta semana Armando Requeixo convídanos á lectura de O meu sangue, a última novela de Diego Giráldez.

O meu sangue (Galaxia) é unha historia de amor e morte. David Ledesma, o seu protagonista, namora de Belén, unha rapaza diagnosticada de ELA á que coñece no traballo. Viven, así, unha intensa historia de amor e teñen un fillo antes de Belén finar, deixando a David sumido nunha fonda depresión. Será entón cando, despois dun intento frustrado de suicidio, David emparelle de novo con María e todo cambie.

Novela sobre os afectos, sobre a memoria dos seres queridos que se nos foron, sobre a importancia das pequenas grandes cousas que compartimos, esta obra de Giráldez é un canto ao amor máis alá da morte e tamén un axuste de contas coa Parca e as súas crueis decisións.

 

 

Tomando ‘Unha cervexa Chang’ con Manuel Portas

Esta semana Armando Requeixo proponnos botar un grolo literario con Unha cervexa Chang, de Manuel Portas.

Esta novela formúlanos unha situación aparentemente simple que logo se revela de gran profundidade: que fariamos se un día, namentres descansamos na beiramar ollando o profundo azul, vemos desaparecer no mar unha rapaza que poucos minutos antes nadaba pracidamente? Avisariamos á policía ou deixariámolo ir porque é unha descoñecida e o asunto non vai connosco e, ademais, ao mellor estamos a preocuparnos por nada?

Literatura sobre o azar e a vontade, sobre o insospeitado e o inevitable, Unha cervexa Chang atrápanos na pescuda das razóns últimas da senrazón.

 

 

Pin It on Pinterest