Hoxe Bieito Romero Diéguez presenta Muiñeira das cabras, a canción é un adianto do disco Canto das Xacias coa súa banda De quen ves sendo. O disco chegará ao mercado o día 8 de setembro -o concerto de presentación será o 18 de setembro no Teatro Rosalía.

O CanJazz, o Festival de Jazz de Cangas, ten xa dende o pasado sábado esgotadas as entradas para todos os concertos que se estendían dende o domingo até mañá, mércores 26.
Toman este dato con orgullo dende a organización, dende a que Xan Campos, membro da Asociación de Jazz de Cangas, nos explicaba como as condiciónsn sanitarias os obrigaron a deixar a localización dos últimos 20 anos, o Eirado do Costal, polo recinto das Naves de Ojera, no que puideron dar lugar a 400 cadeiras.

A organización, aínda coa situación que rodea a todos os eventos nesta época, pode facer alarde de internacionalidade, con artistas como Sara Serpa, Rosolino Marinello ou Román Filiú. Deste xeito, aqueles que estiveran áxiles poderán disfrutar nos días de hoxe e mañá dos cuartetos de Rosolino Marinello e de Brais Lorenzo hoxe, e mañá de Román Filiú e da artista Frasquita Vintage, que pechará este Festival de Cangas de Jazz.

 Festival Bal y Gay puxo fin na pasada noite ós seus 12 días de intensa programación. Uns días nos que contou con artistas nacionais e internacionais de primeiro nivel e no que, ademais da esperada oferta puramente musical, o festival tamén achegou actividades cunha motivación máis didáctica e formativa a aqueles que se achegaron á Mariña lucense, como clases maxistrais ou concertos familiares.

A organización, encabezada pola directora do Festival, Alba Rodríguez, amosou unha grande satisfacción cos resultados acadados nunha edición que -malia ser, polas circunstancias sanitarias, máis complexa do normal- logrou acadar un éxito e un nivel de récord.

O peche de ouro púxoo o Ensemble Bal y Gay, unha agrupación creada para este evento e integrada por novos músicos das máis prestixiosas orquestras e formacións que neste 2020 de homenaxe a Bethoven homenaxearon ó mítico músico e compositor.

Claudio Rodríguez Fer recita no Diario Cultural o poema “Compañeiro ancestral, Isaac Díaz Pardo”, do libro A muller sinfonía (Cancioneiro vital), Ouvirmos. Ourense, 2018.

Isaac Díaz Pardo é unha das figuras máis destacadas da historia do século XX e polo tanto, o centenario do seu nacemento non podería pasar como unha data máis no calendario, unha mera efeméride.

Así é que o Consello da Cultura Galega tomou a iniciativa nesta fin de semana de conmemorar a figura do intelectual galego cun memorial destinado a revisitar e difundir o seu labor.
Entre as accións levadas a cabo, é preciso salientar a publicación da correspondencia entre o propio Isaac Díaz Pardo e o escritor Luís Seoane.

No epistolario, Díaz Pardo e Luís Seoane tratan e discuten multitude de temas, coma a intrahistoria do laboratorio de Formas e Cerámicas de Sargadelos, a problemática que tiña o galeguismo no interior do país e probablemente o tema máis espiñoso: as accións levadas a cabo polo galeguismo no exilio e o choque que supuxo o retornar os restos de Castelao a Galiza.

Xosé Ramón Fandiño é investigador, escritor, tradutor e editor. Xa publicara no 2013 Unha cesta de pombas e mazás. Homenaxe a Isaac Díaz Pardo, e agora acaba de escribir unha nova biografía revisada de Díaz Pardo que está xa no prelo e sairá dentro de un mes.

Co apoio da Área de Cultura da Deputación de A Coruña e comisariado por Performa, a Libraría NUMAX celebra o sábado 22 de agosto a segunda e última xornada dos Discursos en acción, un ciclo de conferencias performativas que muda o Cinema NUMAX nun espazo onde ensaiar propostas entre o divulgativo, o artístico, o escénico ou o audiovisual. Interveñen Jacobo Bugarín, Misha Bies Golas e Xisela Franco 

Durante a mañá e a tarde do sábado 22 de agosto os artistas Jacobo Bugarín, Misha Bies Golas e Xisela Franco serán os encargados de expoñer as súas conferencias ante o público que reserve praza -de balde- no correo comunicacion@numax.org.

Nathaly Ossa estará hoxe na Casa da Cultura de Foz, cun coloquio titulado Música que transforma: como se transforman sociedades a través da música. Unha viaxe a través de proxectos sociais-musicais con extraordinarios resultados que evidencian o poder da música para transformar sociedades e integrar cidadáns. A partir das 20:30h no marco do festival Bal y Gay.

Cúmprese mañá 21 de agosto o centenario do nacemento de Isaac Díaz Pardo.

Recuperamos unha entrevista a Paco Díaz como coordinador de Ensamble Isaac, homenaxe do pobo a Isaac. Memorial Ensamble Isaac ten caracter permanente no Castelo de San Antón en Oleiros.