Pontevedra acolle o décimo Encontro Nacional de Deseño, titulado ‘Cidades imaxinadas, cidades deseñadas’, no que se imaxinan espazos urbanos máis accesibles e inclusivas. Profesionais do deseño, a arquitectura ou a moda participan no evento, que tamén propón actividades abertas á cidadadanía. Conversamos con dous deseñadores galegos que presiden as entidades convocantes, Uqui Permui, de READ,e Xosé García, de DAG. 

Este venres chega aos cines ‘Unicorn Wars’, a segunda longametraxe do coruñés Alberto Vázquez. Un filme de animación para adultos que propón unha fábula antibelicista na que osiños e unicornios se enfrontan nunha guerra tan cruel como as do seres humanos. Conversamos con Alberto Vázquez e mais con Chelo Loureiro, de Abano Producións, unha das produtoras da película, que se pode ver desde este venres en cines de Vigo, Santiago, Ferrol, A Coruña, Ourense, Lugo, Pontevedra e Vilagarcía. 

España é o país convidado na Feira do libro de Frankfurt e as letras galegas tamén están presentes neste grande encontro internacional do sector editorial.  Desprazáronse a Frankfurt doce asociadas da Asociación Galega de Editoras, que participa con espazo propio dentro do stand da Federación de Gremios de Editores de España. Conversamos con Henrique Alvarellos, presidente da AGE, e co escritor Xesús Fraga, un dos autores galegos que participa na feira.