Nova edición do festival de música Bal y Gay na Mariña lucense. Schubert e Gershwin serán os protagonistas desta cita que se desenvolverá en dous tramos: do 14 ao 16 de maio; e do 18 ao 26 de agosto.

Un festival que nesta edición de 2021 aposta aínda máis por mesturar a música co seu entorno, ofrecendo unha experiencia única no musical, patrimonial, paisaxístico e gastronómico. 

No Diario Cultural falamos coa súa directora, Alba Rodríguez, e un dos músicos convidados, o guitarrista Pablo Sáinz-Villegas. 

Estrea o 15 de abril de ‘Terceiro acto’, do Centro Dramático Galego. Unha peza dirixida por Andrea Jiménez e Noemí Rodríguez, sostida na improvisación dun elenco formado por Mabel Rivera, Belén Constenla, Roberto Leal, Fernando Morán e Eduardo R. Cunha ‘Tatán’. 

A peza ofrece unha reflexión sobre a última etapa da vida e reivindica o papel das persoas maiores na sociedade actual.

O Museo MARCO de Vigo pide a catro artistas que dialoguen cos seus diferentes espazos, facéndoos maleables, potenciando as súas calidades, transformándoos. Todos mostran obra recente, a maioría producida para esta ocasióne ningún coñecía ata os días de montaxe a intención dos seus compañeiros.

Os artistas de “4 PROXECTOS” son Mónica Alonso, Rosendo Cid, Salvador e Juan Cidrás, e Mar Vicente. 

A compañía de teatro USC-Lugo estreará a peza ‘A emperadora’ nesta edición do Festival de Teatro Universitario da USC, ao abeiro do convenio Lugo Cultural.

‘Embora’ é o recén estreado traballo discográfico do dúo Verto. En homenaxe ao seu éxito, ‘Todo o que che din’, comprobamos con Alberto Mira que é todo iso que Verto nos dá.