1 de abril, Día das Artes Galegas, que neste 2022 está dedicado ao gran pintor de Lalín, Laxeiro. Hoxe a Real Academia Galega de Belas Artes faille unha homenaxe e nós conversamos co seu presidente, con Manuel Quintana Martelo. Ademais, inaugúrase a exposición Acción Laxeiro, con fotografías de Xurxo Lobato, que tamén está no programa.

E despois, rematamos con teatro. Onte mesmo estreouse en Ourense o novo de Quico Cadaval con Producións Teatrais Excéntricas, inspirado na obra de Risco ‘O porco de pé’, e alí estivo Roberto Pascual, que nos conta todos os detalles.

Neste diario xa celebramos cada mércores o día da literatura infantil con Montse Pena Presas, que por suposto está hoxe comentando o novo de Ledicia Costas, ‘O neno de lume’.

Pero este sábado é o Día da Literatura Infantil, e imos ler o novo de Eva Mejuto, que é ‘Cando leo’, un libro ilustrado por Bea Gregores e que é en si mesmo unha homenaxe á lectura. Porque cando lemos, como di Eva, non hai fame nin frio.

Que pasa cando lemos? Imos descubrilo!

Un dos certames de deseño gráfico máis importantes do mundo está impulsado desde Galicia polas bodegas Terras Gauda. É a Bienal de Cartelismo Francisco Mantecón, que reune desde o 2002 aos máis prestixiosos deseñadores de todo o mundo. Xa se pode ver na Estación Marítima de Vigo os carteis que participan este ano e moi pronto coñeceremos ao gañador. Falamos coa comisaria da Bienal, María José Sánchez

E despois, a recomendación literaria que cada semana nos ofrece Armando Requeixo. Hoxe, con ‘Eu son Exeria’ de Marisa Vidal Collazo.