O museo Ramón María Aller de Lalín ten aberta e ata o mes de marzo unha exposición co título “Diego de Giráldez 1990-2021”, onde mostra ao público unha escolma do pintor. Recoñecido e distinguido, a obra de Diego de Giráldez está presente en museos de Europa, América, Asia e África, así como tamén en coleccións de relevancia mundial. Cunha pintura que nunca pasa desapercibida, salpicada de moitos e, en ocasións, mínimos detalles e esencias que o ollo humano se ve obrigado a descifrar e comprender. A súa mirada detense na relación do home coa natureza e o contorno. Os obxectos, animais ou persoas logran un carácter simbólico e, en ocasións, surreal grazas aos seus xogos de escalas dentro do naturalismo, a abstracción e o surrealismo. Nós falamos con el.

‘A consagración da primavera’ é a obra que o compositor ruso Igor Stravinsky escribiu en 1913. Logo da súa estrea, moitos consideraron o ruso un revolucionario. Un termo ao que el contestaría: “Declárome en contra desta opinión. Se é suficiente romper cun costume para merecer o cualificativo de revolucionario, todo músico que ten algo que dicir e que sae da convención establecida, debería ser cualificado de revolucionario”.

Isto e moito máis, podemos ler en ‘Poética musical’, un libro que nace das conferencias pronunciadas por Stravinsky en Harvard no curso de 1939-1940. No 2021 celebrando os 50 anos da súa morte, podemos lelas por primeira vez en galego, na tradución de Javier Ares Yebra para Alvarellos.

‘O idioma galego baixo o franquismo’, o novo traballo de Henrique Monteagudo na editorial Galaxia.

Monteagudo estuda os anos escuros que viviu a nosa lingua durante o franquismo, sen esquecer a intensa perda de falantes, pero centrándose en dous horizontes: o da resistencia e o da normalización. Ao tempo, asistimos á valentía dos primeiros discursos públicos en galego, as primeiras publicacións liteararias, as primeiras normas gramaticais.

Seguindo o ronsel de autores como Tolkien ou Emily Rodda, a escritora Alba Rozas proponlle ao público infanto-xuvenil unha primeira novela de fantasía épica, que ademais está enraizada na mitoloxía galega. As diferentes razas do reino de Eabaca únense contra as ameazas do cabalo da fiaña e mais a Orcavella, dous seres monstruosos. A pandeireteira Aima e a guerreira Tegra percorren as catro parroquias do reino para activar a resistencia.