Catro anos de traballo fixeron falta para que O jazz dos proscritos saíse á luz. Unha curtametraxe de Manuel Gil que rende homeaxe ao dramaturgo galego Roberto Vidal Bolaño e faino baseándose en nada máis e nada menos que en Saxo Tenor, a obra coa que Vidal Bolaño obtén o premio Álvaro Cunqueiro.

Uns pintorescos veciños dun barrio marxinal reúnense nunha praza para ver Un tranvía chamado Desexo. A uns poucos metros, o sangue dun asasinato aínda está fresco. Un argumento que, sen dúbida, nos recorda ao cine negro que inspiraba a Bolaño e que nos explica mellor o director desta curta, Manuel Gil.

Falamos con Manu Fernández, organizador do festival A Candeloria, que se celebra mañá no Pazo de Feiras e Congresos de Lugo. Trátase da sexta e derradeira edición do festival, que mañá se despide tras 7 anos de traballo.

Nós é o novo traballo discográfico de Marcos Teira, un álbum en que segue unha liña flamenca mesturada co jazz. Trátase dun traballo colectivo, xa que Teira está acompañado por Alfonso Calvo no contrabiaxo, Isaías Salazar bailando, Moisés Fernández no caixón e na percusón e Alejandro Vargas no piano.

Este Nós preséntase mañá no Teatro Principal de Compostela.

A productora executiva de Zenit acompáñanos dende Berlin nesta nova edición do Diario Cultural para falar da película de Isabel Coixet “Elisa e Marcela” que se proxecta hoxe na Berlinale.

O filme narra a historia de dúas mulleres galegas que se coñecen e namoran na escola onde traballan. A través da paisaxe de Galicia poderemonos achegar ata o primeiro matrimonio de mulleres en España a comezos do século XX.

A Radio Galega celebra o Día Mundial da Radio con Medio Bolo, unha aposta pola música a través dos concertos de curta duración coa fusión de tradicional e electrónico de Baiuca e Aliboria. Explicanolo todo a coordinadora deste proxecto Xiana Arias

Carlos Tejerizo é o coordinador dun equipo de investigadores que acaba de descubrir en Casaio, na localidade ourensán de Carballeda de Valdeorras, o maior conxunto de pintura esquemática prehistórica en Galicia.