Dios Ke Te Crew lanza “Silencio”, o adianto do seu novo disco. Falamos con Sockram para saber máis sobre o regreso do grupo de Ordes.

Ademais, o noso colaborador Tito Lesende infórmanos sobre as novidades musicais para as vésperas do nadal.

Comeza a Mostra de Teatro Infantil de Ourense. Tamén falamos de ‘Os presentes proxectados’, a cuarta e derradeira sesión de ‘Mirada, país. Videocreación’.

O documental “Éxodos. De Huellas a Radha y Krishina”, producido por Mondotropo e dirixido polo coruñés Paco Cuesta, estréase hoxe ás 19:00 horas no CGAI da Coruña. O traballo é o resultado de máis dun ano seguindo ao músico de jazz Jorge Pardo.

Ademais, Luis Miguel Crespo, o noso colaborador experto en música clásica, fálanos hoxe sobre José Baldomir, o máis novo dunha serie de compositores relevantes do chamado como rexurdimento musical galego ou nacionalismo musical galego, abandeirado por figuras como Pascual Veiga, Xoán Montes, José Castro “Chané” ou Marcial del Adalid.

Viaxamos ata o Museo das Peregrinacións de Compostela, onde se presenta a iniciativa ‘Proxecta’. O obxectivo é poñer en valor os festivais e mostras de cine en Galicia.

A Fundación Pública Artesanía de Galicia entrega hoxe os Premios Artesanía de Galicia 2018. O obxectivo desta iniciativa é recoñecer a mellora na labor dos profesionais do sector da artesanía galega e contribuir ó seu desenvolvemento económico e promocional.

Ademais, a nosa colaboradora experta en arte, Rosario Sarmiento, fálanos de “Pasearte”, unha mostra que enche os escaparates de Santiago de arte.

O mundo do circo despide a Manuel Lago García e neste Diario Cultural facemos unha homenaxe a súa vida e obra.

O III Encontro de Punkis de Aldea tivo lugar o pasado 8 de decembro en Sarria. Trece grupos que viaxaron ata a vila lucense para gozar da música. O altruísmo e a cultura son os valores compartidos e defendidos por todos os participantes.

Como cada domingo, chega o noso colaborador Cibrán Tenreiro con quen falamos dos títulos de cancións con nomes propios.