Bailamos ao son do grupo A Banda Da Loba, que o vindeiro domingo presenta no Lume Na Palleira o seu novo disco Fábrica De Luz.
Ademáis, ofrecemos varios adiantos e novidades musicais galegas a cargo de Sés, A Banda De Lombás, Fernando Barroso & Banda e Charamuscas.
Esta semana Armando Requeixo tráenos noticia de dous textos narrativos traducidos: Os Estados e Imperios da Lúa, de Cyrano de Bergerac, e mais As confesións dunha filla do século, de Donna Paola.
Traducido dende o francés orixinal por Henrique Harguindey Banet, O outro mundo ou Os Estados e Imperios da Lúa (Rinoceronte) foi escrita por Cyrano de Bergerac a mediados do século XVII. Clásico da literatura de viaxes imaxinarios ao espazo, o autor sérvese do subterfuxio de recrear unha ficticia estancia na Lúa para defrontar o goberno dos lueses co dos terrícolas e así poder criticar a política e a sociedade do seu tempo, especialmente os asuntos relixiosos, o despotismo da realeza e da nobreza e tamén o esquecemento da ciencia e do saber.
As confesións dunha filla do século. Epistolario dunha morta (Hugin e Munin) é unha tradución do italiano realizada por Isabel Soto. A novela foi publicada en 1901 e ten forma epistolar. Nela, a súa protagonista, Viviana, dá a coñecer as dificultades da que foi a súa vida e a visión que ten das relacións interpersoais a través de oito cartas que envía a outras tantas persoas sinaladas e próximas a ela logo de se suicidar. Por medio destas epístolas imos descubrindo a hipocrisía social da súa época, ao tempo que se afirma a liberdade sexual da protagonista, namorada dende adolescente da súa amiga Paola.
Coa nosa experta en arte Rosario Sarmiento, lembramos a figura de Laxeiro a través da mostra “Son eu. Dezaoito autorretratos de Laxeiro. Da afirmación á disolución do suxeito”, exposta na Fundación Laxeiro de Vigo. Nela, por primeira vez, reúnese a totalidade dos autorretratos realuzados por Laxeiro e coñecidos ata a data. Dende os anos vinte ata finais dos anos oitenta un total de dezaoito pezas, feitas en técnicas diversas que ilustran a evolución do artista e a interpretación da súa propia imaxe.
A colaboradora Alba Cid fala esta semana do novo libro do poeta vigués Manuel Forcadela.
A directora de Sala 5, Begoña Vázquez, recomenda esta semana as estreas da película española Adú e o biopic de Judy Garland Judy.
A novela ‘Homes de ferro’, de Alfredo Conde, e mais a escrita de Juan Carlos Mestre en ‘200 gramos de patacas tristes’ son as propostas que nos trae esta semana Armando Requeixo.
Homes de ferro (Ézaro Edicións) é unha narración mariñeira, a crónica da viaxe xacobea que catro irlandeses levan a cabo dende Dublín ata Galicia nun currach, embarcación tradicional en que durante moitas xornadas de singradura e a forza de puro remo salvan a distancia entre estes dous países celticamente irmandados. Alén do propio relato da peregrinación per loca maritima e da descrición detallada do que vai sucedendo na navegación ao longo da costa insular, da beiramar francesa e do periplo cantábrico, a narración vai tecendo aos poucos un retrato das relacións que dende ben antigo unen Irlanda e Galicia, os personaxes míticos que as vencellan como Breogán, Ith, San Brandán ou Amergin, mais tamén todo o que de común temos cultural e identitariamente.
200 gramos de patacas tristes (Espiral Maior) é o primeiro libro en galego deste destacado poeta berciano, un conxunto de máis dun cento de prosas líricas breves nas que a auténtica protagonista é a memoria dun tempo (o da infancia e mocidade), unha paisaxe (a bisbarra natal do autor) e unha paisanaxe (todas as persoas que alí tratou e que deixaron pegada nel). Entrelazadas con todas estas realidades figuran tamén os textos reflexivos e críticos, de carácter social reivindicativo, e tamén outras prosas nas que a propia escrita ou a arte en xeral son o centro de atención.
Hai cubertas de libros que son verdadeiras obras de arte. Tapas de publicacións que foron encargadas a artistas moi diversos e que decidiron enfrontarse a elas como se fosen auténticos lenzos e que —tanto pola calidade creativa, como pola autoría das mesmas— merecerían ser enmarcadas e amosadas como tales nun museo.
Estos traballos obras de arte feitas capa de libro é o fio conductor da mostra en «Primores do múltiplo: encadernación e coleccionismo», unha exposición que na Biblioteca da Cidade da Cultura pór en valor unha característica determinante dos libros que custodia é que habitualmente pasa desapercibida: a encadernación.
Na exposición móstranse algunhas obras nas que esa interrelación entre encadernación e arte é especialmente significativa con especial atención merece a presenza dos artistas galegos na encadernación editorial do século XX. Carlos Maside, Seoane,Ventura Cores, Xohán Ledo, Xosé Díaz, Virxilio, Pepe Barro…
Igualmente, mencionamos a mostra CÁNDIDO FERNÁNDEZ MAZAS: SIGNOS DUNHA QUIMERA que se inaugura o próximo dia 30 neste mesmo espazo da Cidade da Cultura, dedicada a Cándido Fernández Mazas no dia da Ilustración que este ano protagoniza esta gran ilustrador e artista plástico galego.
A Irmandade da Música Galega e o seu labor de recuperación, difusión, e posta en valor do patrimonio musical galego centran a colaboración de hoxe.
Coñeceremos algo máis a Prudencio Piñeiro e Manuel Martí, dous compositores quizais pouco coñecidos para o grande público, pero moi interesantes polo seu legado musical, que centran o concerto que esta asociación, xunto coa Real Academia Galega de Belas Artes, organiza este venres día 31 de xaneiro.
Será no salón de actos desta última institución ás 20h, e correrá a cargo dos mestres Margarita Viso e Javier Ares ao piano, e da mezzosoprano María José Ladra.
Da man da directora de Sala 5, Begoña Vázquez, facemos balance da participación galega nos Goya celebrados en Málaga o sábado.
Falamos co produtor ‘O que arde’ Xavi Font dos premios recibidos por Benedicta Sánchez e Mauro Herce.
Falamos con Beli Martínez dos Premios Goya. A festa do cine español será este sábado en Málaga e contará cunha gran representación galega. Os premios son un recoñecemento aos filmes estreados ao longo de 2019. Nesta edición, Galicia está presente cun total de 9 candidaturas.
Destacan catro candidaturas de O que arde: dirección, filme, dirección de fotografía e actriz revelación con Benedicta Sánchez.
Quien a hierro mata tamén ten tres candidaturas: mellor son con David Machado, Gabriel Gutiérrez e Yasmina Praderas; mellor actor revelación con Enric Auquer; e actor protagonista con Luis Tosar.
O actor Santi Prego é candidato a mellor actor revelación polo seu traballo en Mientras dure la guerra, de Alejandro Amenábar. Entre as candidatas a mellor curta de animación, David Fidalgo, por Homomaquia.