Na colaboración de pop e rock do Diario Cultural, Tito Lesende comeza con dous artistas galegos que coinciden estes días nos escenarios da Coruña: Nastasia Zürcher e Rebeliom Do Inframundo. En canto ás novidades discográficas, adiántanse dous lanzamentos internacionais de nomes ben recoñecidos: Pet Shop Boys e Pearl Jam publicarán proximamente os seus novos discos e aquí se ofrecen respectivos anticipos.
Na colaboración de arqueoloxía con de Mario César Vila falamos da curtametraxe “O Castelo da Lúa”, unha peza que fala sobre o castelo medieval de Rianxo. A presentación é o sábado 25 de xaneiro no Auditorio de Rianxo. A convidada, Adriana Rego, é a directora da produción.
No colaboración de Emilio Españadero no Diario Cultural falamos dalgúns dos grupos confirmados na vindeira edición do Festival Internacional do Mundo Celta de Ortigueira. Entrevistamos a Alberto Balboa, coordinador do festival.
Esta semana Armando Requeixo convídanos á lectura do conxunto de relatos de varios autores O libro dos trens e mais da novela curta de Alberto Fortes O verán en Lucenza.
O libro dos trens (Galaxia) reúne dez historias escritas por Ana Cabaleiro, Anna R. Figueiredo, Antonio Piñeiro, Arantza Portabales, Daniel Asorey, Diego Giráldez, Iria Collazo López, María Alonso Alonso, Miguel Anxo Fernández e Víctor F. Freixanes. Moi diversas tanto nos universos recreados coma na estética compositiva, todas elas coinciden en incorporar a realidade ferroviaria como un elemento constitutivo das súas tramas, en non poucos casos de xeito protagónico e, onda non, como presenza decisiva.
O verán de lucenza (Xerais) achéganos ás vacacións rurais do fillo do Cortizo, un rapaz dos setenta que pasa os días de verán cunhas súas tías maiores. A narración detense nos traballos e nos días da escasa veciñanza da parroquia, ao tempo que amalgama realidade e transmundo para tecer un relato que reflexiona sobre os conceptos de tempo, memoria e existencia e acaba por iluminar lembranzas escurecidas do pasado da xentes do lugar.
Un luns máis, o noso especialista en música clásica, Luis Miguel Crespo, chega con novas recomendacións:
Continuamos coa celebración do 250 aniversario de L.v. Beethoven coñecendo un pouco máis a súa figura e as súas obras, e facémolo tendo como referencia os concertos desta semana da Real Filharmonía de Galicia, nos que a obra de Beethoven estará presente. Este xoves 23 no Auditorio de Galicia de Santiago e o venres 24 no Auditorio Afundación de Pontevedra, ás 20:30h, baixo a batuta da directora australiano-británica Jessica Cottis, a orquestra compostelá interpretará fragmentos do ballet As Criaturas de Prometeo de Beethoven, xunto coas Danzas Concertantes de Ígor Stravinski, e o Concerto de Aranjuez de Joaquín Rodrigo, co afamado guitarrista vasco Enrike Solinís de solista.
As Criaturas de Prometeo é un ballet con música de Beethoven e coreografía de Salvatore Viganó, un dos máis famosos coreógrafos da época, director do Ballet de Viena. Trata o mito de Prometeo na descrición que Platón fai do mesmo no seu libro de xuventude Protágoras. É a única incursión de Beethoven na música para ballet, e nel podemos escoitar por primeira vez varios temas que logo volverá utilizar nas súas Sinfonías nº 1 e Sinfonía nº 3, ademais de noutras composicións. Serviulle tamén este ballet para canalizar unha idea que para el era fundamental na música: o seu carácter de socialización, de como a música serve para facer mellores aos seres humanos.
Montse Pena chega coas súas recomendacións en literatura infantil e xuvenil como cada venres, unidas desta vez polos espazos:
Na colaboración de banda deseñada con Carlos Portela falamos do Cazador de Joe Sparrow e dunha obra de relato gráfico sobre o rural titulado Madialeva, da autora Ana Moreiras.