Esta semana ocupámonos de Pablo Lesuit e Ambigüo, dúas propostas galegas que se presentan en concerto nos próximos días. E tamén da cantautora francesa Laure Briard, que axiña visita Compostela e Vigo.
A directora de Sala 5, Begoña Vázquez recomenda hoxe Longa noite, a película do cineasta de Meira Eloy Enciso que aborda a posguerra civil dende un punto de vista inédito.
Mario César Vila fálanos da exposición “Santomé. Conxunto arqueolóxico – natural”, organizada polo Museo Arqueolóxico Provincial de Ourense. Conversamos co seu director, Xulio Rodríguez González.
Facemos, con Carlos Portela, un repaso das obras de banda deseñada imprescindibles deste 2019: a edición limitada en branco e negro de “V de Vendetta”, de Alan Moore , “Sandman: El Corazón de una estrella”, na que participou Miguelanxo Prado ,”O puño e a letra” de Yolanda Castaño, e moito máis.
Na súa colaboración de hoxe Armando Requeixo convídanos á lectura da novela curta B.S.O., de Pablo Nogueira, e mais do libro de prosas epistolares Fosforescencias, de Lupe Gómez.
B.S.O. (Fervenza) é unha de novela de novelas, que participa por igual do western, o film noir e a narración cinematográfica e musical. Texto híbrido e mestizo, inzado de homenaxes e citas, trénzase cunha singular estrutura concatenada de capítulos breves, orlado lírico e escrita decote eficiente.
Fosforescencias (Alvarellos) é o relato epistolar dun cambio de rumbo que implicou o abandono dun traballo e unha mudanza de vivenda, mais é, sobre todo, a crónica en misivas da refundación do roteiro vital da propia autora e a recapitulación lírico-filosófica do seu xeito de comprender o mundo e os seres.
O proxecto, froito da colaboración entre Xacobeo e CGAC, formúlase como unha renovación e actualización da mirada sobre a realidade do Camiño de Santiago e os seus peregrinos. A intención de Jesús Madriñán é a explorar quen son e como son os pergrinos que percorren actualmente esta ruta.
Innovación para a divulgación científica