A directora de Salta 5 Begoña Vázquez, achéganos esta semana como película destacada unha estrea coreana. Situada como unha das favoritas xa como Mellor Filme Internacional nos Óscar, Paráritos é un filme trepidante, sorprendente e sen tregua que narra a historia de dúas familias, unha rica e outra pobre, que viven en Seúl.
“Todos somos pararitos de todos, quitámonos a respiración uns ós outros”
Carlos Portela rescata a obra “Rulfo: unha vida gráfica”, unha biografía en banda deseñada que percorre os eventos da vida do autor mexicano Juan Rulfo.
Escoitamos hoxe dúas novidades musicais que nos ofrecen Samuel Soto e o grupo The Skirls.
Ademais, como adianto dos contidos do próximo Lume Na Palleira, escoitamos ás formacións que participarán na Xuntanza de Gaiteiros (organizada por Airiños De Fene) que na edición deste ano homenaxeará ao grupo La Musgaña.
Esta semana Armando Requeixo proponnos alternar a lectura de relato e novela. O libro de contos ao que nos convida titúlase Os jeans de María e é obra de Lois Alcayde Dans. A narración longa que nos presenta é Veleno en familia e asínaa Rocío Leira.
Os jeans de María (Galaxia) reúne dezasete historias ambientadas principalmente na cidade herculina, aínda que varias delas tamén acontecen en Madrid. Son, por tanto, narracións urbanas que nos amosan personaxes que ven alterada a súa cotidianeidade polo inesperado. Os medos, os temores e as desesperanzas, mais tamén as ilusións, os desexos e os afectos poboan estes relatos narrados cunha prosa moi coidada, chea de plásticas imaxes e un indubidable alento poético.
Veleno en familia (Baía) é unha narración que entretece intriga e equívocos no seo dunha peculiar familia composta por unha nai rosmona e teimuda, unha filla aparentemente apoucada e sufrida, unha sobriña impulsiva e namoradeira e un xenro visceral e instintivo. As relacións que entre todos eles manteñen ocultan segredos inconfesables, pulsións asasinas e paixóns e odios desmedidos que os levarán ao asasinato e a destrución das súas vidas.
Rosario Sarmiento achéganos á obra dunha artista que xa non está entre nós: de Berta Cáccamo, unha das creadoras contemporáneas máis interesantes da plástica galega.
Falamos da Semana das Músicas do Audiovisual co compositor Xavi Font, membro da directiva da Academia Galega do Audiovisual. O acto central da SEMUA será un concerto de Orquestra Sinfónica de Galicia con obras do arxentino Federico Jusid, o galego Manu Riveiro e unha suite a partir da banda sonora de ‘Sempre Xonxa’.