O Son do camiño comezaba hoxe as catro da tarde e a Radio Galega Música é emisora oficial. No Diario Cultural falamos cos compañeiros Moncho Lemos e Vituco Neira que se atopan no festival. 

Tamén coñecemos o proxecto ‘En voz alta’ de Ángeles Sioli no Museo Municipal de Ourense.

A Real Filharmonía de Galicia ofrece hoxe un concerto no que interpretará a ‘Suit sinfónica Nº1’ do compositor galego Eduardo Soutullo. Unha interpretación dun anaco de 15 minutos da ópera ‘Romance de lobos’. Falamos co compositor Eduardo Soutullo e tamén, sobre o Galicia Escena Pro, con Marta Núñez, técnica de cultura do Concello de Vigo que estivo na comisión da selección dos proxectos Pitchin; e Juan Rodríguez, facilitador nos proxectos que se presentaban ao mercado galego das artes escénicas.

A Xunta acorda co Vaticano que o seu ‘Códice Calixtino’ e o ‘Cancioneiro da Vaticana’ se exhiban por vez primeira en Galicia dentro dunha mostra internacional polo Xacobeo de 2021. As obras exporanse na Cidade da Cultura.

Falamos co conselleiro de Cultura e Turismo, Román Rodríguez; e tamén coñecemos o concerto benéfico da agrupación Son Futuro da Orqeuesta Sinfónica de Galicia.

E temos colaboración con Carlos Portela de banda deseñada.

Hoxe estase a levar a cabo a xornada “Mulleres e antropoloxía en Galicia”, do Consello da Cultura Galega, quw aborda os estereotipos que hai detrás do concepto de “muller galega”.  Unha das coordinadores deste encontro é Nieves Herrero, profesora de Antropoloxía Social da USC, que impartirá a charla “A muller galega, construción e crítica dun estereotipo”.

Tamén coñecemos o novo poemario de Chus Pato titulada ‘Un libre favor’.