Na sala Capitol de Santiago de Compostela tivo lugar hoxe o primeiro concerto que celebra o 25 aniversario do Xabarín Club. Grupos recoñecidos galegos interpretan as míticas cancións do Xabarín como parte dun especial que prepara o programa ‘Inimitables’.
Nesta nova entrega do ‘Diario cultural’ comezamos falando con Alberto Núñez Blanco sobre o auxe dos e-sports pola celebación da ICC Week, en que ademais é coordinador. Tamén nos achegamos ata a Sala Capitol de Santiago, onde se está a celebrar un concerto en homenaxe ao 25 aniversario do Xabarín Club con motivo dun programa especial que prepara a Televisión de Galicia. Por último, o noso colaborador Luis Miguel Crespo introdúcenos no mundo da músia clásica da man de grandes mulleres compositoras.
Hoxe comezaron as actividades do festival de narración oral Atlántica, que se inaugura mañá no Teatro Principal de Santiago de Compostela. Trátase dun festival en que creadores nacionais e internacionais realizarán diferentes espectáculos para todos os públicos en 16 concellos galegos.
Tamén coñecemos o novo traballo de Abe Rábade, que está a presentar estes días e, ademais, hoxe comezaron os traballos para a celebración da décimo segunda edición de Culturgal, que terá lugar no Pazo da Cultura de Pontevedra a finais de ano e, en Nova York, retómanse as actividades arredor da exposición Os adeuses, do Consello da Cultura Galega.
Hoxe descubrimos as grandes viaxes dos animais, moitos deles desprázanse coas estacións do ano, outros teñen que abandonar a zona onde crían. Un gran número de aventuras que aparecen reflectidas no libro ‘Viaxeiros’, publicado por Faktoría K, de Kalandraka Editora.
“Fago libros dirixidos a aquel neno que fun”, explica Xulio Gutiérrez, autor dos seis libros da colección ‘Animais extraordinarios’.
“Somos da xeración de Félix Rodríguez de la Fuente, foi un grande inspirador”, conta o ilustrador do libro, Nicolás Fernández.
Coa chegada da primaveira, as anduriñas voan ata Galicia. Proceden dende África e chegan guiadas pola experiencia e pola vista.
“É moi curioso que estes animais teñan unha parte do seu cerebro e unha parte da súa retina conectadas de tal maneira que ven literalmente o norte”, explica Xulio Gutiérrez.
Libros feitos en Galicia en que podemos descubrir como son as viaxes dos animais, dos que chegan e dos que marchan máis alá da nosa terra.
Falamos do libro ‘Viaxeiros’ co seu escritor, Xulio Rodríguez, e co seu ilustrador, Nicolás Fernández. Unha obra sobre as migracións dos animais publicada pola Editorial Kalandraka. Tamén falamos de libros traducidos ao galego con Armando Requeixo.
‘O soño da serpe’ centra a súa historia nunha rapaza chamada Luz, que ao comezar a universidade comeza tamén unha busca para coñecer as súas raíces e o seu pasado. Trátase dunha novela fantástica con toques de realismo que supón a primeira novela do deseñador gráfico Antonio Seijas, que acumula numerosas publicacións de banda deseñada.
Antonio Seijas ten o Premio á Mellor Obra Nacional de Expocomic, é gañador ao mellor guión na Feira do Cómic de Barcelona e Premio Castelao da Deputación da Coruña.
Nesta edición do ‘Diario cultural’ falamos co deseñador gráfico Antonio Seijas sobre a súa primeira novela, ‘O soño da serpe’. Un libro de literatura xuvenil que centra a súa historia nunha rapaza chamada Luz, que ao comezar a universidade comeza tamén unha busca para coñecer as súas raíces e o seu pasado. Tamén escoitamos un novo capítulo da nosa laretada con Pepe Barro; e Rosario Sarmiento achéganos a mostra de pintura holandesa e flamenca ‘Trazos maestros’, que se pode visitar na Fundación Barrié da Coruña.
Falamos coa escritora María Xosé Queizán, que recibiu o sétimo premio de Igualdade Ernestina Otero que concede o Concello de Vigo. Ademais, esta tarde celébrase unha mesa redonda arredor do seu traballo na Casa Galega da Cultura de Vigo.
Arata Isozaki recibe o Premio Pritzer 2019. Falamos con César Portela, arquitecto co que traballou na Domus da Coruña, e con Antonio Maroño, decano do Colexio de Arquitectos de Galicia.
O arquitecto Arata Isozaki recibe o Premio Pritzer 2019. Naceu en 1931 e creceu no Xapón destruído pola segunda guerra mundial. O seu primeiro encontro coa arquitectura foi nunha zona cero, nun lugar onde xa non había arquitectura, xa non había cidade. Aí comezou o interese de Isozaki por descubrir como as cidades podían levantarse dende a nada.
En Galicia temos algunhas das súas obras, como o Centro de Estudos Avanzados do Parque de Vista Alegre en Compostela ou a Domus da Coruña, que realizou xunto ao arquitecto galego César Portela.
“Ambos estabamos de acordo en que a Domus tiña que ser construída con materiais de aquí, porque ademais traballabamos sobre unha antiga canteira”, explica Portela.
“Arata Isozaki ten moi claro que o mundo é un, pero hai moitas culturas. Nós, os arquitectos, temos que coñecer os sitios onde traballamos”, engade.
“A Domus é unha obra emblemática, como unha vela ao vento na baía do Orzán que demostra que se pode construír e non destruír un territorio”, indica o arquitecto.
“Penso que a arquitectura do país ten un papel moi destacado no panorama mundial”, explica Antonio Maroño, decano do Colexio de Arquitectos de Galicia.