A escritora Eva Mejuto publica ‘Memoria do silencio’, un libro que narra a historia de tres irmás de Ribadavia que salvaron medio milleiro de persoas da persecución nazi. As tres galegas axudaban a cruzar a fronteira con Portugal.

A maioría de historias que coñecemos da II Guerra Mundial son produto de Hollywood e de protagonistas estranxeiros. Pero, que ocorreu en Galicia?

A historia destas tres mulleres foi viaxando de persoa a persoa a través dun libreiro de Monforte. Cando as atoparon, elas fixéronlle prometer ao libreiro que agardaría ata que elas morresen para contar a súa historia.

“Temos máis presente a historia mundial que a nosa”, lamenta a escritora e engade: “A literatura e a investigación poden rescatar o que a historia non contou”.

Agora, as súas vivencias quedarán gravadas para sempre sobre tinta e papel.

O 30 de xaneiro é o Día da Paz, pero tamén da Ilustración, xa que é a data de nacemento de Castelao. Esta edición está dedicada ao ilustrador Federico Rivas.

O vigués Federico Rivas foi un pioneiro na dirección de arte no ámbito da publicidade, chegando a ser un dos grandes artistas da década dos 20 e dos 30.

Neste espazo cultural falamos con Bea Lamas, quen descubriu a ilustración buscando novos camiños profesionais. Alí atopou un mundo apaixoante e tamén descubriuse a si mesma.

“O artista ten que enfrontarse só ao papel en branco, pero logo o traballo sae ao mundo e está presente na nosa vida diaria”, conta o ilustrador Santy Gutiérrez.

“Todo o que temos ao redor é ilustración, o noso traballo é moi social”, engade o experto.

Ambos recordan os seus inicios como ilustradores, unha paixón que foron descubrindo dunha forma moi natural nas súas vidas.

Nun día de celebración coma hoxe, a Cidade da Cultura e as bibliotecas galegas convértense no centro dun gran número de actividades relacionadas con este ámbito artístico.