Rodolfo e Priscila é, así de entrada, un nome curioso para unha editora independente. Detrás están os escritores Berta Dávila e Carlos Meixide, que veñen con dous libros, ou dúas pequenas xoias, chamadas ‘A poesía como arte insurxente’ e ‘Pequeno álbum de Nova York en inverno’. Deses libros que precisan amor. Presentáronse oficialmente nesta pasada feira Culturgal, e xa están en librerías para ser acollidos polas lectoras.
Rodolfo, un pequeno león de peluche, e Priscila, unha bailarina que habita unha caixa de música, son as memorias que levaron a Carlos e Berta a facerse editores. Iso e unha viaxe a Nova York.
Hoxe o Diario Cultural esténdese na tarde nun programa especial dende a feira da cultural galega, o Culturgal!
Falamos co director do Culturgal, Xosé Aldea; con Pepe Cunha, o comisario da exposición Cantámola en galego; temos dose extra de teatro co director do Centro Dramático Galego, Fran Núñez, con Cándido Pazó e con Marta Pazos, e metémonos en faladoiro literario coas editoriais Apiario, Irmás Cartoné e Kalandraka.
E entre prato e prato, como non sempre a montaña vai a Mahoma, Vituco Neira encárgase de achegarse ós diferentes postos desta gran feira da cultura galega.
Todo isto e máis cabe neste especial do Diario Cultural dende Culturgal.
Berto con B é Berto Mira, un dos Verto con V. Hoxe debuta en solitario con este disco, ‘Viaxe ao espazo exterior’, logo de converterse nun dos fenómenos da música pop en Galicia xunto ao seu compañeiro Fer. Xa sabemos que Verto con V decidiran facer un parón nos seus concertos, pero mentres agardamos, temos xa con nós este novo disco.
11 cancións intimistas que xogan co Rnb, o Techno, o lo-fi ou o Bedroom Pop. Un traballo que explora de maneira conceptual o gran problema da saúde mental na xuventude, e no que está acompañado por Toni Martelo, Hevi de Malandrómeda e Fer, compañeiro no proxecto VERTO.
Chegan ás librarías galegas dous libros tan feministas como irreverentes. Hércules de Ediciones publica na súa colección Púrpura Mala feminista, unha colección de ensaios da estadounidense Roxane Gay, e Rinoceronte Editora achega a novela Como ser famosa, da xornalista inglesa Caitlin Moran.
Pava é o que queda mentres se vai esgotando un cigarro. Pava é tamén unha forma de chamar a unha moza. Ademais da femia do pavo, non nos olvidemos desa acepción. Pero a partir de hoxe, ‘PAVA’ é tamén o título do primeiro proxecto musical en solitario de Lucía Aldao. O primeiro disco logo de 20 anos nos escenarios coa música e a poesía a voltas.
Desde este 25 de novembro está dispoñible en todas as plataformas dixitais este ‘Pava’ de Lucía Aldao.
Mañá é 25 de novembro, o dia da Elimininación da Violencia de Xénero, e a cultura, a literatura neste caso, é o medio escollido para retratar a súa dureza. En ‘Perez. Historia dun triunfo’, a violencia machista está no centro da historia, pero sempre oculta de cara a sociedade. As mulleres padecen mentres os homes gozan de prestixio social e mesmo son premiamos.
Vémolo desde a cuberta do libro. Un cinto e unhas gotas de sangue, que páxina a páxina van tomando presenza. É o momento de sacar a venda dos ollos e actuar para que os maltratadores non saian impunes.
Llerena Pérez Perozo escribe na súa primeira novela sobre o triunfo que só chega da colaboración entre as mulleres.