‘Microspectivas dun Marica Millennial’ é un espectáculo da compañía Incendiaria, formada por Davide González e Vanesa Sotelo, que cuestiona as certezas impostas que predestinan a construción da identidade.

A partir da música e as artes do movemento, ofrece un espazo de transo no que redescubrir as raíces e refundar o presente. O resultado da peza é unha viaxe sensorial que camiña polos lindes da performance, a instalación, a música, as artes do movemento e a creación escénica contemporánea.

Pode verse esta fin de semana na sala Ártika de Vigo, no marco do I Ciclo de Danza e Artes do Movemento. 

Alberto Cunha publica ‘Escolma aberta’, un libro disco que reúne música, poesía e pintura para render homenaxe á cultura galega. 

Alberto Cunha pon a música e a voz, Ramón Trigo as ilustracións, e diversos colaboradores do mundo cultural como Moncho Lemos, María Lado ou Ledicia Costas aportan as súas reflexións sobre os poemas escollidos. 

A Sala Artika de Vigo acolle este mes o I Ciclo de Danza e Artes do Movemento. A compañía Provisional Danza será a encargada de comezar este ciclo cun espectáculo de tres artistas: Tatiana Chorot, Cristian Lopez e Sebastián Calvo para o venres 4, o sábado 5 e o domingo 6.

O 11, 12 e 13 de xuño estará a Compañía Incendiaria con “Microspectiva dun Marica Millennial”.

Finalizará este ciclo o artista Javier Martín co seu espectáculo “Teorema”.