Do 12 ao 24 de agosto o festival Bal y Gay ofrece trece concertos en diferentes vilas da Mariña luguesa. A Real Filharmonía abre o fesival, que pechará a Orquestra Sinfónica de Galicia. Será a edición máis internacional, con nomes como a pianista Elisabeth Leonskaja ou o Armida Quartett,

pero tamén haberá nomes galegos e españois como o Cuarteto Quiroga, Caamaño & Ameixeiras o Skyrion.

Emma Ríos e David Rubín son dous dos autores galegos máis relevantes da banda deseñada e testemuñas destes 25 anos Viñetas desde o Atlántico. Os dous asistiron ao festival desde o comezo, primeiro parte da escena galega de fanzines, hoxe xa como autores consolidados. Falamos cos dous da historia de Viñetas e das obras que publicarán proximamente. 

Eduard Velasco estréase na literatura infantil con Animalario de ler a diario, un poemario protagonizado por bechos de todo tipo e no que xoga coas palabras e coa métrica. O libro está ilustrado por Nuria Díaz, publícao Edicións Xerais e foi finalista en dúas ocasións do premio Merlín de literatura infantil.

Gustavo Couto avánzanos dúas das citas ineludibles da nosa música esta fin de semana, que volven con forza trala pandemia: a Festa da Carballeira de Zas, con Xabier Díaz e as Adufeiras de Salitre ou Xisco Feijóo, e As Nosas Músicas, na parroquia estradense de Couso, onde tocarán Leilía e Airiños da Freba, entre outros. 

O ciclo de pensamento ‘Filosofía para veraneantes’ está dedicado este ano a reflexionar sobre o uso da tecnoloxía e os seus aspectos construtivos e destrutivos. Baixo a pregunta ‘Ilusionismos tecnolóxicos?’ convida profesores de Filosofía, científicos, poetas, xornalistas e a todos os asistentes a conversaren sobre intelixencia artificial, Antropoceno, extractivismo ou Internet.