As escritoras Berta Dávila e Olga Novo fanse cos Premios da Crítica 2019 que outorga anualmente a Asociación Española de Críticos Literarios (AECL)

Gañadora do premio na modalidade de poesía galega no 2014 con “Raíz da fenda”, Berta Dávila volve facerse co Premio da Crítica. Esta vez, en narrativa galega con “Carrusel”. Unha novela de autoficción publicada pola Editorial Galaxia, que xa fóra galardoada o pasado ano co Premio García Barros. 

E na modalidade de poesía en galego, este ano o premio foi para a escritora Olga Novo por “Feliz idade”. Un poemario da Editorial Kalandraka escrito durante sete intensos anos nos que a autora vive a enfermidade do seu pai ata a súa morte, contada con absoluta tenrura. 

Comeza tamén a XXV edición do Ourense Film Festival que se prolongará ata o 3 de outubro. A competición oficial de longametraxes do festival outorgará 5 galardóns: a Calpurnia á mellor película, premio Carlos Velo á mellor dirección, premio especial do xurado, premio ao mellor guión e á mellor interpretación. 

Amáis o festival concederá catro recoñecementos: o Premio do Público; Premio Xacobeo, que será outorgado por unha comisión formada por membros da Fundación Carlos Velo, Deputación de Ourense e Xunta á mellor obra con produción ou coprodución galega de todo o festival; o Premio Especial “Eduardo Barreiros”, á mellor opera prima do cinema español estreada entre setembro de 2019 e setembro de 2020; e o Premio CIMA, concedido pola Asociación de Mulleres Cineastas e de Medios Audiovisuais (CIMA) á mellor directora da sección oficial.

O Ourense Film Festival rendirá homenaxe a dúas figuras senlleiras que deixaron pegada no festival. Ao realizador, guionista, produtor, editor e fotógrafo Eloy Lozano, director do festival na súa primeira edición, daquela como Festival de Cine Independente de Ourense, en 1996; coa proxección da súa película ‘As belas dormentes’ e a publicación dunha monografía da man do escritor e crítico de cine Eduardo Galán, ‘Eloy Lozano, o cineasta que devorou a luz’. 

Precisamente esa primeira edición de 1996 dirixida por Lozano, abriuse coa proxección de ‘La Moños’, producida por Adolfo Domínguez, que será premiado coa Calpurnia Especial 25 anos. 

Inicia co título “Libres. En serio?” a cita que xunta nomes moi recoñecidos do pensamento e do ámbito cultural como a sexóloga Valérie Tasso, o editor Francisco Castro ou a escritora Inma López Silva. Durante dous días falarase de tinder, fútbol e series de televisión e de como afectan á nosa liberdade.