A nosa colaboradora especialista en literatura infantil e xuvenil Montse Pena recomenda dúas novas obras moi agardadas, unha para cada tipo de público: ‘O can de Milú’ e ‘A que cheiran as cores’.
Presentamos unha das novísimas cancións de Paul McCartney, que tamén anunciou un recital en Barcelona en 2020. E centrámonos nalgunhas das citas musicais desta fin de semana: Kiko Veneno estreando o museo MEGA de Estrella Galicia como recinto de concertos (venres 29), as portuguesas Anarchicks regresando a Galicia para tocar en Compostela (venres 29) e Cangas (sábado 30) e os nosos clásicos Heredeiros da Crus enchendo a sala Capitol (sábado 30).
A directora de Sala 5, Begoña Vázquez, trae esta semana como recomendacións na carteleira películas entre pais e fillos:
“A odisea dos Giles” con Ricardo e Chino Darín; e “A filla dun ladrón” con Greta Fernández e o seu pai Eduard.
Lembramos, da man de Carlos Portela, a figura de Purita Campos, gran expoñente da banda deseñada nacional.
Angel de la Calle presenta nova obra: “Pinturas de guerra”.
A nosa colaboradora en artes escénicas Rut Balbís, falou esta semana dos programas “Residencias Paraíso”. Este mes de novembro remataron a súa terceira edición, co apoio de AGADIC e o colectivo RPM.
Ofrecemos hoxe un adianto de “Non Hai Fallo”, o novo disco do grupo Abóbriga que presentarán o vindeiro domingo no programa Lume Na Palleira.
Tamén falamos con Ramón Dopico sobre as distintas actividades previstas na XI Xornada De Cultura Popular Galega, organizada en San Sadurniño por Berros Do Castro.
Esta semana Armando Requeixo convídanos á lectura das novelas Formigas nos pés, de Nazaret López, e mais A casa xunto ao volcán, de Xosé Ricardo Losada.
Formigas nos pés (Xerais) é o relato dun desamor, da ruptura amorosa dunha parella de moitos anos. Unha muller na fronteira dos cincuenta ten que se reconstruír deixando atrás o que foi o amor da súa vida, con todas as renuncias, feridas e sombras que a nova situación lle trae, mais esperanzada en atopar unha luz ao final dese longo e doloroso proceso que a obriga a renacer das súas propias cinzas.
A casa xunto ao volcán (Galaxia) é a historia de Xeila, unha rapaza de dezasete anos que, por mor do traslado laboral de seus pais, pasa de vivir en Ourense a estudar nun instituto de Rianxo. Este cambio, unido ás ensinanzas dun seu exprofesor de Filosofía, levarán a Xeila a reformular a súa vida e as relacións que mantén coas persoas que a rodean, facendo que abrollen novas personalidades súas ata entón ocultas.