Mónica Maneiro comenta ‘Un nuevo día’, a primeira exposición individual en Galicia do artista asturiano Juan Fernández Álava. A mostra inclúe unha serie de pinturas á esfera cotiá do pintor de composición moi contemporánea e influenciada pola fotografía; tamén hai retratos dalgúns dos referentes culturais do artista, como Robert Mapplethorpe, Pina Bausch, Lou Reed ou Gloria Fuertes. ‘Un nuevo día’ pode visitarse na Galería Trinta de Santiago ata o 11 de decembro.

Mónica Maneiro comenta a exposición ‘Eros y Tánatos’, que comparten dous artistas, como adoita ocorrer nas propostas da galería compostelá Dupla. Neste caso son Yolanda Dorda e Roberto González Fernández quen se encargan de abordar artisticamente a pulsión vital e a pulsión de morte. A mostra pode visitarse ata o 24 de novembro. 

Mónica Maneiro fálanos da mostra ‘Ante a inminencia’ do artista sarrián Rubén Santiago, que pode visitarse na sala Normal da Coruña ata o 19 de xaneiro. A exposición, comisariada por Susana González, parte dunha historia familiar, un tío avó encarcerado durante a guerra civil no castelo de santo Antón, para abordar cuestións como o abastecemento de auga ou o valor da arte como mercadoría. O público da mostra pode votar para decidir o destino das moedas recollidas polo artista do alxibe do castelo. 

Mónica Maneiro fálanos da mostra de Rubén Ramos Balsa na galería Nordés de Santiago. ‘La objeción de Ernst Mach a la línea del horizonte (de eventos)’ une arte e ciencia, unha constante na obra do artista santiagués, que reside en Singapur. A figura do físico austríaco Ernst Mach e a colaboración de Ramos co científico senegalés Oumar Haidara Fall vertebran a mostra, na que fotografías, debuxos, mobles e artefactos forman case unha instalación.

Mónica Maneiro avánzanos esta mostra que poderá verse ata o 15 de novembro na sala Manuel Moldes da Facultade de Belas Artes de Pontevedra. Conversamos con María Marco, comisaria desta exposición que Rosalía Banet constrúe a partir de debuxos que descompoñen o corpo humano. ‘Os Sobrantes’ é unha mostra sen residuos en cuxa montaxe vai colaborar o propio alumnado de Belas Artes. 

‘Unnamed road’ é o título da segunda mostra da australiana Narelle Jubelin na galería Nordés de Santiago. A exposición inclúe pezas que transitan entre o obxecto escultórico, a pintura, a fotografía e os bordados, nun discurso que con frecuencia parte da reflexión sobre a arquitectura para analizar os usos e contextos sociais. A mostra pode visitarse ata o 15 de setembro.