Nerea Barros preséntanos “Morir para contar”, un documental dirixido por Hernán Zin. Esta obra conta a historia de grandes reporteiros de guerra que narran as súas peores lembranzas e o xeito no que se enfrontaron a elas. Ao mesmo tempo, coñecemos de preto o traballo de quen brinda axuda aos xornalistas que padecen tensión postraumática. Cada protagonista de “Morir para contar” falará dun conflito en particular, polo que será tamén unha viaxe á guerra desde Vietnam ata os nosos días, así como unha homenaxe aos compañeiros.

Chicharrón publican con Prenom o seu terceiro disco, un traballo circular en branco, negro e vermello que se presentou en directo en Carballo. Unha ocasión para falar coa banda pero tamén para coñecer o novo centro social autoxestionado Casino 1889.

Matthew Sweet acaba de sacar disco e vén de xira por aquí cerca. Beck dixo un día que cando era neno pasaba moitas horas escoitando a radio esperando que soasen temas excitantes. A Matías Tarrio pasoulle algo parecido. Foi no ano 97 cando tiña 15 anos e é aí onde comeza esta colaboración: Viva Matthew Sweet!

Visitamos Ciclón: un espazo en Compostela dos artistas David Silva e Misha Bies Golas en que creadoras e creadores de diferentes disciplinas interveñen un cuarto durante un día e crean con 100 fotocopias unha obra que se reproduce nunha publicación coa colaboración da Axencia Gráfica. En Ciclón conversamos con tres artistas: Jaione Camborda, Carlos Maciá e Carolina Cordeiro.