Destacados

Sucasas, a figura e a súa contorna

O Museo Municipal Ramón Mª Aller de Lalín acolle ata o 30 de xullo a exposición ‘Alfonso Sucasas: a figura e a súa contorna’, comisariada por Pilar Corredoira.

Desde os primeiros pasos, inclúe o autorretrato, a etapa dos 60-70 e a influencia de Venezuela e Brasil. Inclúe un video documental que recompila entrevistas nos medios de comunicación, como a TVG.

A Radio Galega recupera material sonoro destacado de Xela Arias do arquivo da CRTVG

A emisora pública achegará dúas entrevistas realizadas á poetisa sobre a súa obra e 13 poemas recitados pola autora protagonista das Letras Galegas 2021.

Ofrecerá tamén un especial sobre a vida e obra da escritora, realizado ao seu falecemento, a través das opinións de especialistas e amigos.

Radio Galega vai ofrecer material sonoro moi relevante sobre a autora homenaxeada nas Letras Galegas de 2021, Xela Arias, recuperado do arquivo da CRTVG. A emisora pública ten previsto emitir proximamente dúas entrevistas e un total de 13 poemas lidos pola escritora, que lles permitirán aos oíntes coñecer máis en profundidade a vida e obra literaria dunha das voces máis destacadas da poesía galega contemporánea.

Entre este material recuperado do arquivo sonoro da CRTVG, cómpre salientar dúas entrevistas, que se ofrecerán como parte da programación especial da Radio Galega o propio 17 de maio. A primeira delas, é un dos poucos documentos en que a poeta fala sobre o seu último libro ‘Intempériome’ (2003), 50 días antes do seu falecemento. A través desta conversa con Ana Romaní, no tempo do ‘Diario Cultural’, Xela Arias explica algúns dos trazos da súa poética, reflexiona sobre o sentido da poesía, fala do seu uso da lingua e explica a estrutura do libro.

A segunda entrevista realizouna a Radio Galega con motivo da publicación do libro ‘Darío a diario’ (1996). O contido deste arquivo é tamén destacado, xa que ademais é das poucas ocasións en que fala desta publicación. Nesta ocasión, a poetisa conversa con Carlos Blanco e Ana Romaní sobre o proceso de escritura, reflexiona sobre a experiencia da maternidade e o sentido do libro, e sitúao en relación coas súas obras anteriores.

Entre os meses de abril e maio, a emisora pública galega ofrecerá unha boa mostra da súa voz poética, renovadora, transgresora e comprometida. De ‘Intempériome’, a RG emitirá 8 poemas recitados pola autora e, do seu terceiro poemario ‘Darío a diario’, dedicado ao seu fillo e onde aborda a maternidade desde unha ollada allea ao tradicional, achegaranse 5 poemas declamados tamén por Xela Arias. Esta selección de poemas poderase escoitar a través do ‘Diario cultural’, do diariocultural.gal e das redes sociais.

A Radio Galega tamén porá a disposición da súa audiencia, de xeito íntegro na web da CRTVG, unha edición especial do ‘Diario cultural’, realizada con motivo do pasamento de Xela Arias, en que se recollen as primeiras reaccións polo seu falecemento, unha aproximación á obra e vida da escritora, a través das opinións de especialistas e amizades, como Xulián Moure, Manuel Bragado, Miguel Anxo Fernán-Vello, Xosé Luís Méndez Ferrín, María do Carme Kruckenberg, Carmen Panero, Helena González e Xabier Rodríguez

Este material sonoro, que a Radio Galega conserva coa voz da poetisa de Sarria, está a disposición das institucións culturais e investigadoras da figura da autora.

“Os nomes dos locais comerciais din moito dun sitio”

O volume ‘Estudos de Onomástica V. Os nomes comerciais’da RAG  reúne un feixe de achegas sobre o valor do galego para as marcas.

O volume complétase coas reflexións dende a perspectiva das empresas da zoqueira Elena Ferro, as deseñadoras Irene García e Raquel Boo, e Xosé González, que leva décadas traballando na promoción do galego no sector empresarial.

“Miña avoa traficaba con LSD”

A produtora audiovisual Illa Bufarda presenta hoxe na Mostra Internacional de Cinema Etnográfico o seu documental ‘Negro Púrpura‘ sobre o dentón. 

Adriana P. Villanueva e Sabela Iglesias explícannos que é exactamente o dentón e de onde nace a idea de facer un documental sobre el. 

Unha amiga díxonos que súa avoa traficaba con LSD. Aí había unha historia. 

Marilar Aleixandre: “A situación das prisións reflicte un problema da sociedade”

‘As malas mulleres’, novela de Marilar Aleixandre, consegue o premio Blanco Amor.

A nobreza moderna

O profesor de historia Paulo Nogueira Santiago fálanos do seu novo libro ‘A nobreza galega na Idade Moderna’, no que resume a configuración da nobreza urbana nos séculos XVI e XVII. 

Que é unha poeta?

Baía Edicións publica ‘Xela Arias: palabra á intemperie‘. A través dunha conversa a tres bandas, Emma Pedreira e Laura Romero preséntannos a Xela Arias, poeta, tradutora, docente, letrista e, sobre todo, muller transgresora.

Poemas a dúas voces, colaxes e ilustracións para recuperar e coñecer a figura dunha das nosas voces máis interesantes e, se cadra, máis descoñecidas da literatura.

No Diario Cultural, Emma Pedreira conversa con Ana Romaní.

A quinta edición de Enreguéifate: “Rebeldía con alegría”

Como cada ano por estas datas (e xa hai cinco!), o certame Enreguéifate comeza a súa andaina á procura de estudantes e público en xeral que se apunte á práctica da arte da improvisación oral coa regueifa en lingua galega. Nesta ocasión, faino ademais coa recente boa nova de ter recibido o Premio Mil Primaveras da Coordinadora de Traballadores/as de Normalización da Lingua (CTNL) ao mellor proxecto estabilizado.

O prazo de participación estará aberto desde o 29 de marzo ata o 28 de maio de 2021 e a inscrición poderá facerse desde a páxina web do certame, onde tamén están xa dispoñibles as bases: www.enregueifate.gal. Falamos con Manolo Maseda e con Iván Calaza.

16ª Mostra Internacional de Cinema Etnográfico

Do 6 ao 10 de abril desenvolverase en Compostela a 16ª edición da MICE, a Mostra Internacional de Cinema Etnográfico, organizada polo Museo do Pobo Galego. Os filmes poderán verse no propio museo, na sala Numax e no Teatro Principal. 

11 filmes participarán na sección oficial a competición, pero fóra diso poderemos ver tamén a estrea de ‘Negro Púrpura’, unha creación de Illa Bufarda

Pepe Carballude presenta ‘A pintora libertaria’

Maruja Mallo é a protagonista da nova novela de Pepe Carballude, ‘A pintora libertaria’.

Pin It on Pinterest