O Ateneo de Santiago organiza a primeira edición do Festival de Música Antiga e Barroca. A apertura do festival correrá a cargo dunha conferencia audiovisual na que Manuel Vilas repasará a presenza da arpa na historia do cine.

Falamos con Jose Víctor Carou, director artístico do festival, e co arpista Manuel Vilas.

Coñecemos a banda de underground vigués Frying Luras, que fan 20 anos de traxectoria. Celébrano cun novo disco que os levará de xira polas mellores salas do país. Falamos con eles dende a terraza do Lobishome en Vigo.

O FICRURAL organiza un encontro de festivais e presenta ‘Galicia na memoria’ unha escolma de fondos fotográficos e cinematográficos do Ministerio de Agricultura.

Conversamos co director do festival Aser Álvarez, o especialista en cine rural e na Mediateca do Ministerio, Juan Manuel García Bartolomé e cos responsables dos festivais de Ascaso e Dos Torres.

Neste país de canteiros, a nosa cultura está escrita na pedra. O escultor Manolo Paz inaugura ‘Reflexos na auga’, en Compostela.

Gonzalo Hermo gaña con ‘Diario dun enterro’ o Premio de Narrativa Breve Repsol. Galaxia publicará antes de finais de ano a primeira novela do rianxeiro.

‘Diario dun enterro’ é unha novela breve e veloz coma o ritmo das novas vidas ou coma un avión de Barcelona á aldea de Eiradona. Unha novela que se suma a ese xénero “literario pero tamén cinematográfico ou teatral no que por un acontecemento – neste caso un enterro – unha familia se ve obrigada a convivir de novo e aí sucede todo”.

O xornalista da Radio Galega Anxo Quintela foi galardoado co Premio Nacional de Xornalismo Cultural 2019 pola súa “continuada implicación no coñecemento e difusión da cultura rural, ás veces desatendida, contribuíndo á súa lexitimación”. Así mesmo, o xurado recoñeceu a súa traxectoria en múltiples campos do xornalismo cultural en lingua galega, na Radio Galega, onde presentou o programa ‘Diario Cultural’, e na TVG, onde foi durante moitos anos o rostro de ‘O Agro’.

Concedido polo Ministerio de Cultura e Deporte e dotado con 20.000 euros, o galardón recoñece a traxectoria xornalística no ámbito da cultura desenvolvida por un cidadán español cuxa actividade estea dedicada á información cultural, sexa cal for a lingua ou linguas do Estado utilizadas no desenvolvemento do seu labor. É a segunda vez consecutiva que un profesional da CRTVG recibe este recoñecemento, xa que o ano pasado foi premiada a xornalista Ana Romaní.

Nado en Vigo en 1960, Anxo Quintela é un xornalista cunha extensa traxectoria na radio e a televisión galegas, en que participou en programas sobre un amplo rango de manifestacións culturais, entre elas a cultura agraria galega. É tamén poeta, tradutor e actor e levou a cabo distintos proxectos culturais de difusión de poesía, música e lingua galega.

Ademais, foi guionista, director e realizador de distintos documentais e programas de televisión, redactor xefe da revista ‘Agrocultura’ e, entre 1988 e 1990, membro do consello de redacción de ‘Grial’, a máis importante e máis antiga revista cultural de Galicia. Entre 2003 e 2008 foi director de ‘Vieiros’, o primeiro xornal electrónico de Galicia, en que incluíu unha ampla oferta de contidos culturais.

Na súa faceta como escritor, destacan os libros de poesía ‘Á sombra dos pavillóns’  e ‘O asasino estrábico’. Tamén traduciu ‘A casa da madriña’, de Lygia Bojunga Nunes, e ‘Afinidades culturais Galicia-Irlanda’, de Elisabeth Frances Keating.

Este non é o único premio recibido por Anxo Quintela ao longo da súa carreira, xa que en 1982 foi galardoado co Premio Esquío por ‘Á sombra dos pavillóns’ e en 2005 co Premio Leixaprén pola súa promoción e defensa da lingua galega.

Comezamos semana falando de literatura e dragóns. Dragóns que existen na nosa tradición e en moitas lendas galegas. Elena Gallego é a autora da saga ‘Dragal’, que chega a súa quinta entrega editada por Xerais.

Nalgún lugar da costa galega os dragalianos exploran os seus poderes. Híbridos entre humanos e dragóns, invisibles ao ollo humano durante milenios…poderán eludir a tecnoloxía do século XXI?

Mentres o cabaleiro alquimista ensaia a fórmula que garantirá a supervivencia da estirpe, as damas da Fraternidade alíanse para protexer a xestación dunha nova criatura.

Pero os inimigos do dragón non descansan: o achado dun pergamiño que desvela a existencia das catacumbas pode supor un desastre.

Dragal V explora os límites entre realidade e ficción científica para conquistar novos e vellos lectores. “Só quen se mergulle no sangue da lúa descubrirá o segredo do dragón”.

Programa especial dende o Caudal Fest no comezo da segunda edición.

Jacobo Naya de La M.O.D.A., Jon de Tigre y Diamante  ou a ourensá Marem Ladson pasan polo noso set. Conducido por Vituco Neira.