Todas as colaboracións

Lemos ‘Liñas compartidas’ e ‘O paraugas na raiola e outros relatos’

11 Xuño, 2019

Esta semana Armando Requeixo proponnos a lectura de dous libros de contos: Liñas compartidas, un volume colectivo de máis dunha vintena de voces, e O paraugas na raiola e outros relatos, de Paco Rivas.

Liñas compartidas (Toxosoutos) é o resultado do esforzo comunal dos vinte e dous participantes no obradoiro de creación que, baixo o título de Historias no espello, impartiu o narrador Antón Riveiro Coello entre setembro e outubro do pasado ano no concello de Rianxo. O que aquí se ofrece é o froito daquelas sesións de traballo, que se concretan nesta publicación de máis de catrocentas páxinas e dúas ducias de contos, algúns asinados colectivamente e outros de autoría individual, historias ben diversas tanto nas temáticas abordadas coma nos motivos, ambientacións e estilos ensaiados.

O paraugas na raiola e outros relatos (Baía) é un conxunto de oito narracións do profesor, filólogo e escritor norlucense Paco Rivas. Ambientadas nos eidos da beiramar cantábrica, continúan a liña aberta polo autor en Mar..usía. Relatos salpresados (2017) e convídannos a coñecer historias e personaxes nas que non falta o humor, o lirismo, a fabulación, a crítica social, o xogo metaliterario e mesmo a épica.

Lévedo, un proxecto musical de Bouba e A Máquina de Mallar

10 Xuño, 2019

Comezamos a colaboración de hoxe presentando a Lévedo, un proxecto de confluencia entre as propostas musicais das pandeireteiras Bouba e da Máquina De Mallar. O resultado é unha orixinal fusión de tradición e rock progresivo.

A continuación unha mostra das novas incorporacións ao cartel deste ano do Festival Internacional do Mundo Celta de Ortigueira: Stolen Notes e Andrés Penabad.

Por último, como adianto dos contidos do Lume Na Palleira do vindeiro domingo, escoitamos o grupo Arxe, que presentará o seu primeiro traballo discográfico.

Sleater-Kinney prepara disco e xira

9 Xuño, 2019

Matías Tarrio achéganos hoxe a un dos grupos femenimos máis representativos do rock alternativo estadounidense: Sleater-Kinney.

Ciencia e televisión

9 Xuño, 2019

Manuel Vicente ensínanos neste Diario Cultural a relación da ciencia coa televisión.

Chega a Coruña o S8

7 Xuño, 2019

Beli Martínez fálanos do Festival S8, a Mostra de Cinema Periférico de A Coruña

Propostas literarias para coñecer mellor o planeta

7 Xuño, 2019

Montse Pena fálanos de obras para coñecer mellor o planeta e para facernos consciente do que estamos a facer con el.

A primeira proposta é Animalia 2. Branco de Xosé Tomás en Xerais. Un conxunto de  tiras máis ou menos cómicas  sobre o mundo animal no ambiente polar. De aí o subtítulo da obra, “branco”, que remite por contraste ao que foi o primeiro volume da serie, ese animalia “verde”. En realidade pola obra van pasando todo tipo de cuestións “humanas” que, sen dúbida, aluden a quen le: dende a envexa (que fai un loro con esa exuberancia de cores no Ártico), a frustración -o fracaso dun lobo que montou unha fábrica de conxelados no Polo Norte-, o medo -o pesadelo dun osiño cos abrigos de pel-,ou o estupor, propiciado polas excursións da terceira idade ao Ártico protagonizada por animais da selva. De feito, o creador anímanos a ler esas viñetas en clave humana, pedíndonos dende o comezo que coloquemos unha cara de persoa neses animais.

A outra proposta é un libro tamén moi especial, que tamén forma parte dunha serie, aínda que non se trate dunha obra de ficción. É Inventario de froitas e verduras de Virginie Aladjidi e Emmanuelle Tchoukriel, traducido por Fernando Moreiras para Kalandraka. O libro propón unha aproximación implecable ao mundo das froitas e das verduras, cunha chea de curiosidades e cunha representación gráfica que combina a fermosura coa precisión na súa representación. A obra é un magnífico convite a saber curiosidades sobre as froitas e as verduras que quizais descoñeciamos, por exemplo, a saber que tamén hai berenxenas brancas, a coñecer a planta das lentellas ou a ser consciente de que piña é unha palabra da lingua guaraní que significa “perfume dos perfumes”. Un libro diferente para gozar del en familia e aos pouquiños, imprescindible -este ou calquera dos da súa colección- nunha biblioteca familiar con variedade de títulos e de formatos.

Novos discos de Santana e Bruce Springsteen

6 Xuño, 2019

Tito Lesende fálanos do retorno de dúas vacas sagradas do rock internacional a piques de estrear novos discos: Santana (coa voz de Concha Buika) e Bruce Springsteen. 

Coñecemos o Galicia Escena Pro 2019

5 Xuño, 2019

A nosa colaboradora de artes do movemento, Rut Balbís, recoméndanos o mercado de artes escénicas Galicia Escena Pro 2019 que se celebrará do 10 ao 13 de xuño en Santiago de Compostela.

Centenario da Coral de Ruada de Ourense

5 Xuño, 2019

Unha exposición de alumnado de Escenografía e unha posta en escena dun texto de Xavier Prado Lameiro no cal participou alumnado da ESAD xunto cos membros da centenaria Coral, engalanaron estes días as rúas e o Teatro Principal de Ourense para divulgar o que supuxeron aqueles Coros, os seus Cadros de Declamación e a actividade escénica durante o Rexionalismo e a época das Irmandades da Fala, tanto para a dignificación do idioma como para o asentamento dunha tradición de noso na cultura escénica popular.

A versión escénica desta Retirada de Napoleón, de Prado Lameiro, mantén os elementos característicos daqueles espectáculos. Este traballo, presentado o 31 de maio no Teatro Principal de Ourense, estivo coordinado por profesorado da Escola Superior de Arte Dramática de Galicia, xunto cos membros da Coral. Mestura e une a interpretación cómica de personaxes tipo, con elementos costumistas, música, baile e o canto final do Himno Galego, como era costume e tradición. Pero sobre todo, con estas actividades mestúrase tradición, historia, patrimonio, traballo documental e novos valores. O traballo coa comunidade e con distintos axentes culturais fará máis sensible e mellor a unha profesión en formación que, pola súa banda, fai sentir fresca e dinámica a unha institución coma a Coral de Ruada, depositaria de parte inconmesurable da identidade e da memoria cultural dun país.

Lemos ensaios de Teresa Moure e Diana Varela

4 Xuño, 2019

Esta semana Armando Requeixo invítanos á lectura de dous interesantes ensaios: Diario sen datas dunha aborixe galega, de Diana Varela Puñal, e mais Linguística Eco, de Teresa Moure.

Diario sen datas dunha aborixe galega (Laiovento) é un conxunto de preto de dúas ducias de prosas nas que a poeta e narradora Diana Varela Puñal incide en cuestións varias que xiran arredor dos conceptos de identidade, poesía e ética. As nocións de galeguidade e nacionalismo, o pensamento ético en relación coa educación na non violencia ou o culto ao feísmo, amais do papel da escritora na nosa sociedade son outros tantos asuntos tratados nestes escritos, sempre lúcidos e reveladores.

Linguística Eco (Através) é unha ben fundamentada e moi didáctica proposta da profesora e escritora Teresa Moure, quen nos convida a repensar preconceptos cos que nos afixemos a vivir e que escurecen a nosa nítida percepción da imprescindible vivencia ecolingüística que precisa o planeta: as falacias que nos arrastran a distinguir entre linguas ‘fáciles’ e ‘difíciles’, ‘grandes’ e ‘pequenas’, ‘complexas’ e ‘simples’; a ignorancia da abraiante multiplicidade idiomática dos territorios e o espellismo dos monolingüismos estatais; o mito da ‘lingua nai primixenia’ e da ‘lingua universal futura’; ou o espiñento tema da desaparición dos idiomas que, case sempre, enmascara auténticos lingüicidios son outros tantos temas que aborda este fondo e documentado ensaio, que incorpora un prólogo do prestixioso profesor Juan Carlos Moreno Cabrera.

Pin It on Pinterest