Fran Cañotas, rostro coñecido da televisión de Galicia, presenta ‘Os nomes da nosa terra’, un micro documental da Asociación Socio-Pedagóxica Galega. Nel, percorreron varios lugares da nosa xeografía para saber dos feitos e historias que orixinaron os nomes das aldeas, das leiras, dos camiños e mesmo das pedras. Barcia de Mera, A Coruña, Oleiros, Arteixo, Marzoa e o Monte Pindo, son os seis lugares elixidos para descubrir as historias que agochan as súas corredoiras. Están todas dispoñibles na canle de Youtube de Política Lingüística.

Achégase o día da Ilustración, unha data que se celebra cada ano o 30 de xaneiro, coincidindo co aniversario do nacemento de Castelao. Un día para lembrar e reivindicar o papel dos profesionais da ilustración na industria cultural; e tamén, homenaxear a unha ilustradora ou ilustrador histórico. O protagonista deste ano é o coruñés Reimundo Patiño.

Patiño naceu no 36 e finou no 85, con tan só 49 anos, pero foi unha das figuras máis destacadas da arte galega, enmarcado nos anos da ditadura primeiro, e no cambio social e político da transición despois. Traballou principalmente en Madrid, pero sempre cun compromiso vivo con Galicia, co galeguismo e coa resistencia ao réxime. Entender isto lévanos a entender algo mellor a súa obra.

No programa de hoxe falamos sobre Reimundo Patiño con Daniel Buján, comisario da exposición que o homenaxea na Biblioteca de Galicia; e tamén con Antón Patiño, pintor e familiar, que reivindica a “urxencia vital” da arte de Reimundo.

A historia comeza así: unha moza chamada Sarah aparece nos accesos a Antiquonia, con amnesia, e trata de descubrir quen é e que fai nese lugar. En canto comeza a falar coa veciñanza, decátase de que pasa algo, e de que as casualidades non o son tanto.

 Esta é a proposta de ‘Intruder in Antiquonia’, un videoxogo de aventura clásico, en 2D e de mecánica “point and click”, que é o novo traballo de Aruma, o estudio da Coruña formado por Silvia Izquierdo e Rubén López. Acaba de saír a súa demo en Steam, así que queremos que nos conten máis sobre o que agardar nesta aventura.